ഒരു സിനിമ ഭ്രാന്തന്റെ പെണ്ണുകാണൽ; വൈറലായി ഫേസ്ബുക്ക് പോസ്റ്റ്

ഒരു പെണ്ണുകാണൽ ചടങ്ങ്
.
കൂടെ വന്ന അമ്മാവൻ: അപ്പോൾ പറഞ്ഞത് ഓർമയുണ്ടല്ലോ. സിനിമയുടെ കാര്യം ഇവിടെ മിണ്ടിപ്പോകരുത്. ജോലിക്ക് ശ്രമിക്കുകയാണ്, ടെസ്റ്റുകളൊക്കെ കുറേ എഴുതിയിട്ടുണ്ട് എന്നൊക്കെയാണ് ഇവിടെ പറഞ്ഞിട്ടുള്ളത്
.
ചെക്കൻ: അങ്ങനെ നുണ പറയേണ്ട കാര്യം എനിക്കില്ല
.
പെണ്ണിന്റെ അച്ഛൻ: എന്താ??
.
അമ്മാവൻ: ഒന്നുമില്ല. ചില ഭാവികാര്യങ്ങളൊക്കെ പറയുകയായിരുന്നു
.
ചെക്കൻ: അല്ല… അന്താരാഷ്ട്ര സിനിമാലോകത്തെ ഒരു ബുദ്ധിജീവിയാണ് ഞാൻ.
.
അമ്മാവൻ : ഒരു തമാശയ്ക്ക് സൈഡായിട്ട് സിനിമകളൊക്കെ കാണാറുണ്ട്.
.
ചെക്കൻ: തമാശയോ?? സിനിമ എന്റെ ജീവാത്മാവും പരമാത്മാവുമാണ്. എനിക്ക് പെൺകുട്ടിയോട് ചില കാര്യങ്ങൾ ചോദിച്ചറിയാനുണ്ട്. Predestination നും, Mulholland Drive ഉം ഒക്കെ കണ്ട് കിളി പറന്ന് സ്വബോധം നഷ്ടപ്പെട്ട ജനങ്ങളുടെ മോചനത്തിനു വേണ്ടി തോളോടു തോൾ ചേര്‍ന്ന് പ്രവര്‍ത്തിക്കാൻ തയ്യാറുണ്ടോ?? പറയൂ..
.
ചെക്കൻ: വേണ്ട.. ഞാൻ തയ്യാറെടുപ്പിച്ചോളാം. കുട്ടിയുടെ സിനിമാ നിലവാരം എനിക്ക് പരിശോധിക്കണം. തർക്കോവിസ്കിയുടെ സൊളാരിസ് എന്ന സിനിമ കണ്ടിട്ടുണ്ടോ? അല്ലെങ്കിൽ പെർസോണ. ഇങ്മാർ ബെർഗ്മാന്റെ? അതുമല്ലെങ്കിൽ മെമെന്റോ? എന്താ.. സിനിമ കാണാറില്ലേ?
.
അച്ഛൻ : അതൊക്കെയുണ്ട്. HBO യിലും Star Movies ലും വരുന്ന മിക്ക സിനിമകളും ഞങ്ങളിവിടെ എല്ലാവരും കാണാറുണ്ട്.
.
ചെക്കൻ: അത്രേയുള്ളോ!! ശരി, കണ്ട സിനിമകളിൽ ഏറ്റവും ഇഷ്ടപ്പെട്ട സിനിമ ഏതാണ്?
.
പെണ്ണ്: അത്..
.
അച്ഛൻ: ഏതാ മോളേ.. ഏതായാലും പറഞ്ഞേക്ക്.
.
പെണ്ണ്: ഏറ്റവും ഇഷ്ടപ്പെട്ടത് HBO ൽ വന്ന ട്വിലൈറ്റ്
.
ചെക്കൻ: ട്വിലൈറ്റോ.. അതെന്ത് ലൈറ്റാണ്??
.
അമ്മാവൻ: അതേതെങ്കിലും ഉത്സവപറമ്പിൽ ഇടുന്ന ലൈറ്റായിരിക്കും.
.
അച്ഛൻ: ടോം ക്രൂസിനെയും റോബര്‍ട്ട് പാറ്റിൻസണേയും മോൾക്ക് വലിയ ഇഷ്ടമാ.
.
ചെക്കൻ: ഇഷ്ടമെന്നു പറഞ്ഞാൽ??.. അതു സാരമില്ല.. എനിക്ക് ചില നിബന്ധനകളുണ്ട്. കല്യാണശേഷം ഹണിമൂൺ ട്രിപ്പിനോ, ബന്ധുക്കളെ കാണാൻ പോകാനോ ഒന്നും സമയമുണ്ടാകില്ല. കല്യാണശേഷം വീട്ടിൽ വരിക. ഒരു സിനിമ കാണുക. അന്നത്തെ ചടങ്ങ് കഴിഞ്ഞു. ഞാനധികവും റൂമിനുള്ളിലായിരിക്കും. ലാപ്പ്ടോപ്പിന്റെ മുന്നിൽ. സ്റ്റാൻലി കുബ്രിക്കിന്റെ Shining എന്ന സിനിമ കണ്ടിട്ടില്ലേ. അതുപോലൊരു ജീവിതമായിരിക്കും കുട്ടിയുടേത്. പുതിയ പുതിയ സീരീസുകൾ വരികയാണല്ലോ. ചിലപ്പോൾ ദിവസങ്ങളോളം ഭക്ഷണമോ വെള്ളമോ ഇല്ലാതെ അതൊക്കെ കണ്ടു തീർക്കേണ്ടി വരും. ഒരു സിനിമാ പ്രേമിയുടെ ഭാര്യ എന്തും സഹിക്കാൻ പ്രാപ്തയായിരാക്കണം. ചിലപ്പോൾ ഞാൻ സൈക്കോളജിക്കൽ ത്രില്ലറുകൾ കണ്ട ഹാങ്ങോവറിൽ കുട്ടിയെ ആക്രമിക്കാൻ വന്നേക്കാം. അപ്പോൾ ഉള്ള ജീവനും കൊണ്ട് ഓടി രക്ഷപ്പെടേണ്ടി വന്നേക്കും
.
അച്ഛൻ: മോള് അകത്തേക്ക് പൊയ്ക്കോ. ആ അമ്മാവൻ ഒന്നിങ്ങോട്ട് വന്നോ
.
.
അച്ഛൻ : താൻ വല്ല സീരിയൽ കില്ലറിനെയാണോ എന്റെ മോൾക്ക് ഭർത്താവായി കൊണ്ടു വന്നേക്കുന്നത്?
.
അമ്മാവൻ: എന്നോട് ക്ഷമിക്കണം. ഞാനിത്രയും പ്രതീക്ഷിച്ചില്ല
.
അച്ഛൻ: എത്രയും പെട്ടെന്ന് അവനെ പിടിച്ചോണ്ട് പോയില്ലെങ്കിൽ നിങ്ങളെ ഏതെങ്കിലും റൂമില് പൂട്ടി, Timer ഉം വെച്ച്, വല്ല ട്രാപ്പും സെറ്റ് ചെയ്യും. എന്റെ പഴയ സ്വഭാവം അറിയാല്ലോ..
.
അമ്മാവൻ: അയ്യോ. വേണ്ട.. ഇപ്പോ തന്നെ പോയേക്കാം.
.
.
അമ്മാവൻ: എണിക്ക്. പോകാം
.
ചെക്കൻ: അല്ല. എന്റെ നിർദ്ദേശങ്ങളുടെ പ്രതികരണം അറിഞ്ഞില്ല
.
അമ്മാവൻ: പ്രതികരണം അറിയാൻ നിന്നാൽ ആ Jigsaw ഭ്രാന്തൻ ശരീരവും തലയും വേറെ വേറെയാക്കി ഏതെങ്കിലും മൃഗത്തിനു തിന്നാൻ ഇട്ടുകൊടുക്കും
.
ചെക്കൻ: ഇത് ഞാനെവിടെയോ കേട്ടിട്ടുണ്ടല്ലോ.
.
അമ്മാവൻ: എണീക്ക്. എല്ലാം പോണ വഴിക്ക് പറയാം..

(ഉദയ് കൃഷ്ണ എഴുതിയ ഫേസ്ബുക്ക് കുറിപ്പ്)