തിരക്കുകൾക്കിടയിലും ‘ഇഷ്‌ക്’ കാണാൻ നിയമസഭാ സാമാജികരെത്തി; ആണത്തമെന്ന പരികൽപ്പനയെ തള്ളിക്കളയുന്ന സിനിമയെന്ന് ബൽറാം

അനുരാജ് മനോഹർ സംവിധാനം ചെയ്ത ‘ഇഷ്‌ക്’ സിനിമയുടെ പ്രദർശനത്തിന് തിരക്കുകളെല്ലാം മാറ്റി വെച്ച് നിയമസഭാ സാമാജികരുമെത്തി. മന്ത്രിമാർക്കും എംഎൽഎമാർക്കുമായി ഇന്നലെയാണ് തിരുവനന്തപുരം അജന്ത തീയറ്ററിൽ സിനിമയുടെ പ്രത്യേക പ്രദർശനം സംഘടിപ്പിച്ചത്. മന്ത്രിമാരായ എ.കെ ശശീന്ദ്രൻ, എം.എം മണി, കടന്നപ്പള്ളി രാമചന്ദ്രൻ, സ്പീക്കർ പി.ശ്രീരാമകൃഷ്ണൻ എന്നിവർക്കൊപ്പം എംഎൽഎമാരും സിനിമ കാണാനെത്തിയിരുന്നു.

ആണത്തമെന്ന പരികൽപ്പനയെ പൂർണമായി തള്ളിക്കളയുന്ന സിനിമയാണ് ഇഷ്‌ക് എന്ന് ചിത്രം കണ്ട ശേഷം വി.ടി ബൽറാം എംഎൽഎ ഫേസ്ബുക്കിൽ കുറിച്ചു. സമകാലിക പ്രസക്തി ഏറെയുള്ളതാണ് പ്രമേയമെന്നതിൽ തർക്കമില്ലെന്നും അനുരാജിനും മുഴുവൻ ടീമിനും പ്രത്യേക അഭിനന്ദനങ്ങൾ നേരുന്നതായും ബൽറാമിന്റെ ഫേസ്ബുക്ക് കുറിപ്പിൽ പറയുന്നു.

വി.ടി ബൽറാമിന്റെ ഫേസ്ബുക്ക് പോസ്റ്റ്‌

‘ഇഷ്ക്’ കണ്ടു. എംഎൽഎമാർക്കുള്ള പ്രത്യേക ഷോയ്ക്ക് സംവിധായകൻ അനുരാജ് മനോഹർ അടക്കമുള്ള അണിയറ പ്രവർത്തരുടെ സാന്നിദ്ധ്യവുമുണ്ടായിരുന്നു.

സമകാലിക പ്രസക്തി ഏറെയുള്ളതാണ് പ്രമേയമെന്നതിൽ തർക്കമില്ല. സദാചാരപ്പോലീസിംഗും സ്വകാര്യതയിലേക്കുള്ള തുറിച്ചുനോട്ടവും ആണത്തധാരണകളുമൊക്കെ നമ്മുടെ സാംസ്കാരിക മുഖ്യധാരയായി തുടരുന്നിടത്തോളം ഇതുപോലുള്ള സിനിമകൾ കൂടുതൽ ചർച്ച ചെയ്യപ്പെടേണ്ടതുണ്ട്. ‘സെക്സി ദുർഗ’യുമായുള്ള ആശയ സാമ്യം ഇതിനോടകം ചർച്ചയായിട്ടുണ്ട്. അവതരണം പലപ്പോഴും ‘കോക്ടൈലി’നേയും ഓർമ്മിപ്പിച്ചു.