അഡ്മിഷൻ ഫോമിലെ ‘ജാതി’ കോളങ്ങളിൽ ഒന്നിൽ ‘മനുഷ്യൻ’ എന്ന കോളവും; മാതൃകയായി ഒരു കോളേജ്

എല്ലാ സ്ഥാപനങ്ങളിലെയും ഫോമുകളിൽ ജാതി/മതം രേഖപ്പെടുത്താനുള്ള ഒരു കോളവും ഉണ്ടാകും. എന്നാൽ ഒരു ജാതിയിലും മതത്തിലും അടയാളപ്പെടുത്താൻ താൽപ്പര്യമില്ലാത്തവരുണ്ടാകും. അവരേത് കോളത്തിൽ ടിക്ക് ചെയ്യും ? എന്നാൽ കൊൽക്കത്തയിലെ ഒരു കോളേജിൽ ജാതി/മത കോളത്തിൽ വിവിധ ജാതികൾക്കൊപ്പം ‘മനുഷ്യൻ’ എന്ന ഓപ്ഷനും ഉൾപ്പെടുത്തിയിരിക്കുകയാണ്.

കൊൽക്കത്തയിലെ ബെതുൻ കോളേജാണ് ഈ നല്ല മാറ്റത്തിന് തുടക്കം കുറിച്ചിരിക്കുന്നത്. ഹിന്ദു, ഇസ്ലാം, ക്രിസ്ത്യൻ, ജൈനിസം, ബുദ്ധിസം എന്നീ മതവിഭാഗങ്ങൾക്കൊപ്പമാണ് ‘ മനുഷ്യൻ’ എന്ന കോളവും ഉൾപ്പെടുത്തിയിരിക്കുന്നത്.

‘ചില കുട്ടികൾ ജാതിയുടെ പേരിൽ തങ്ങളെ അടയാളപ്പെടുത്താൻ മടിക്കുന്നുണ്ട്. അത്തരം കുട്ടികളുടെ വീക്ഷണത്തെ പ്രോത്സാഹിപ്പിക്കുന്നു. മനുഷ്യരാശിയുടെ ജാതി മനുഷ്യത്വമാണ്. അതുകൊണ്ട് തന്നെയാണ് ജാതി കോളത്തിൽ മനുഷ്യൻ എന്ന കോളവും ഉൾപ്പെടുത്തിയിരിക്കുന്നത്. അഡ്മിഷൻ കമ്മിറ്റിയുടെ കൂട്ടായ തീരുമാനമായിരുന്നു ഇത്.’- കോളേജ് പ്രിൻസിപ്പൽ മമത റെയ് പറയുന്നു.

Bethune College, Kolkata

ഇന്ന് നടക്കുന്ന ഒട്ടുമിക്ക എല്ലാ പ്രശ്‌നങ്ങൾക്ക് പിന്നിലും ജാതി/മത വ്യത്യാസങ്ങൾ ഒരു പ്രധാന ഘടകമാണ്. ജാതീയമായ അധിക്ഷേപങ്ങളുടേയും, മതവെറി, വേർതിരിവുകൾ എന്നിവയുടെയെല്ലാം ഇക്കാലത്ത് ഒരു ജാതിയിലേക്ക് ചുരുങ്ങുന്നതിൽ നിന്നും ‘മനുഷ്യൻ’ എന്ന തലത്തിലേക്ക് പടരുന്നതിന് സഹായിക്കുന്ന ഇത്തരം പ്രവണതകൾ വരാനിരിക്കുന്ന നല്ലകാലത്തിന്റെ പ്രതീക്ഷകൾ നൽകുന്നതാണ്.