തിരുവനന്തപുരം ആർട്‌സ് കോളജിൽ എസ്എഫ്‌ഐ ഗുണ്ടായിസം; വനിതാ മതിലിൽ പങ്കെടുക്കാത്ത വിദ്യാർത്ഥികൾക്ക് ഭീഷണി; ശബ്ദസന്ദേശം ട്വന്റിഫോറിന്

തിരുവനന്തപുരം ആർട്‌സ് കോളജിലും എസ്എഫ്‌ഐ ഗുണ്ടായിസം. വിദ്യാർത്ഥികളെ ഓഫീസിൽ വിളിച്ച് ഭീഷണിപ്പെടുത്തിയെന്നാണ് പരാതി. വനിതാ മതിലിലും പ്രകടനത്തിലും പങ്കെടുക്കാത്ത വിദ്യാർത്ഥികളെയാണ് ഭീഷണിപ്പെടുത്തിയത്. വിദ്യാർത്ഥികളെ ഭീഷണിപ്പെടുത്തുന്ന ശബ്ദസന്ദേശം ട്വന്റിഫോറിന് ലഭിച്ചു.

വനിതാ മതിലിന് പിന്നാലെയാണ് ഈ സംഭവം നടന്നത്. അന്ന് ഇത് തുറന്ന് പറയാനുള്ള ധൈര്യം പെൺകുട്ടികൾക്കുണ്ടായിരുന്നില്ല. എന്നാൽ യൂണിവേഴ്‌സിറ്റി കോളജ് വിഷയത്തിന്റെ പശ്ചാത്തലത്തിലാണ് പെൺകുട്ടികൾ ശബ്ദസന്ദേശം പുറത്തുവിടുന്നത്.

Read Also : യൂണിവേഴ്‌സിറ്റി കോളജ് വധശ്രമം; കേസിലെ മൂന്ന് പ്രതികൾ ഇന്ന് കീഴടങ്ങിയേക്കുമെന്ന് സൂചന

വനിതാ മതിലിൽ പങ്കെടുക്കാതിരുന്നതെന്താണെന്നാണ് ശബ്ദസന്ദേശത്തിൽ എസ്എഫ്‌ഐ നേതാക്കൾ ചോദിക്കുന്നത്. ആ സമയത്ത് എവിടെ പോയെന്ന ചോദ്യത്തിന് വീട്ടിൽ പോയതാണെന്ന് വിദ്യാർത്ഥികൾ മറുപടി നൽകുന്നുണ്ട്. വിദ്യാർത്ഥികളോട് വളരെ മോശമായി സംസാരിക്കുന്ന യൂണിയൻ നേതാക്കളുടെ ശബ്ദം ഓഡിയോ ക്ലിപ്പിൽ വ്യക്തമാണ്. യൂണിയൻ ചെയർമാനും മറ്റ് യൂണിയൻ നേതാക്കളുമാണ് പെൺകുട്ടികളെ യൂണിയൻ ഓഫീസിലേക്ക് വിളിച്ച് ഭീഷണിപ്പെടുത്തിയത്.