മലമ്പുഴ ഡാം ഉടനെ തുറക്കില്ല

മലമ്പുഴ ഡാമിലേക്കുള്ള നീരൊഴുക്ക് കുറഞ്ഞതിനാൽ മലമ്പുഴ ഡാം ഉടനെ തുറക്കില്ല.

നേരത്തെ മലമ്പുഴ അണക്കെട്ടിലെ ജലനിരപ്പ് 112 .95 മീറ്ററിലെത്തിയാൽ ഡാം തുറക്കുമെന്ന് എക്‌സിക്യൂട്ടീവ് എൻജിനീയർ അറിയിച്ചിരുന്നു. മലമ്പുഴ അണക്കെട്ടിലെ വെള്ളം എത്തുന്ന മുക്കൈപുഴ, കൽപ്പാത്തിപ്പുഴ, ഭാരതപ്പുഴ പ്രദേശത്തുള്ളവർക്ക് ജാഗ്രത നിർദ്ദേശവുമുണ്ടായിരുന്നു. എന്നാൽ ഡാം തുറക്കാനുള്ള തീരുമാനം മാറ്റിയതോടെ ഡാം തുറക്കുന്നതിന് മുന്നോടിയായി നേരത്തെ നൽകിയിരുന്ന ജാഗ്രതാ നിർദേശവും പിൻവലിച്ചു.

മൂന്ന് ദിവസമായി തുടരുന്ന കനത്ത മഴയിൽ പ്രളയസമാനമാണ് പാലക്കാട് ജില്ലയിലെ മിക്ക പ്രദേശങ്ങളിലും. കനത്ത മഴയിൽ വെള്ളം കയറി നഗരത്തിലെ പ്രധാന ഹൗസിംഗ് കോളനികൾ പോലും വെള്ളത്തിനടിയിലായ അവസ്ഥയാണ്. വീടുകളിലെ ഒന്നാം നില വരെ വെള്ളം ഉയർന്നു.