കൊച്ചിയിൽ യുവതിക്ക് നേരെ ആക്രമണം; ഇതര സംസ്ഥാന തൊഴിലാളിയെ നാട്ടുകാർ പിടികൂടി പൊലീസിൽ ഏൽപ്പിച്ചു

കൊച്ചി നഗര മധ്യത്തിൽ യുവതിക്ക് നേരെ ആക്രമണം. മഹാരാജാസ് മെട്രോ സ്റ്റേഷന് സമീപം രാത്രി എട്ടരയോടെയാണ് സംഭവം. ഇതര സംസ്ഥാന തൊഴിലാളിയെ നാട്ടുകാർ പിടികൂടി പൊലീസിൽ ഏൽപ്പിച്ചു. ലഹരി മരുന്ന് ഉപയോഗിച്ച് ബോധമില്ലാത്ത അവസ്ഥയിലായിരുന്നു ഇയാൾ.

മെട്രോ സ്‌റ്റേഷനിലേക്ക് കയറാൻ ശ്രമിക്കുകയായിരുന്ന യുവതിയെ പ്രതി പിന്തുടർന്ന് ശല്യം ചെയ്തു. കയറി പിടിക്കാൻ ശ്രമിച്ചതോടെ ഭയന്ന് സമീപത്തുകണ്ട കാറിൽ യുവതി അഭയം തേടുകയായിരുന്നു. അക്രമാസക്തനായ പ്രതി കാറിന്റെ ചില്ലിൽ തട്ടി ബഹളമുണ്ടാക്കിയതായി സംഭവ സ്ഥലത്ത് ഉണ്ടായിരുന്ന ചിലർ പറഞ്ഞു. സംഭവം നടന്ന് മണിക്കൂറുകൾ കഴിഞ്ഞാണ് പൊലീസ് എത്തിയതെന്ന് ആക്ഷേപമുണ്ട്. തമിഴ്‌നാട് സ്വദേശിയാണ് പ്രതിയെന്നാണ് വിവരം.