പൗരത്വ നിയമ ഭേദഗതിക്കെതിരായ പ്രമേയം; മുഖ്യമന്ത്രിക്കെതിരെ അവകാശലംഘന നോട്ടീസ്

പൗരത്വ നിയമ ഭേദഗതിക്കെതിരായ പ്രമേയത്തിന്റെ പേരിൽ മുഖ്യമന്ത്രി പിണറായി വിജയനെതിരെ അവകാശലംഘന നോട്ടീസ്. ബിജെപി നേതാവ് ജിവിഎൽ നരസിംഹറാവു ആണ് നോട്ടീസ് നൽകിയത്.

മുഖ്യമന്ത്രി അവതരിപ്പിച്ച പ്രമേയം പാർലമെന്റിന്റെ പരമാധികാരത്തിന് എതിരാണെന്ന് നരസിംഹറാവു ആരോപിക്കുന്നു. നിയമസഭാ പ്രമേയം ഭരണപരമായ ആശയക്കുഴപ്പത്തിനിടയാക്കും. ഇത് പാർലമെന്റ് അവകാശം ഹനിക്കുന്നതാണെന്നും നോട്ടീസിൽ പറയുന്നു.

പൗരത്വ നിയമ ഭേദഗതി റദ്ദാക്കണമെന്നാവശ്യപ്പെട്ട് സംസ്ഥാന നിയമസഭ പ്രമേയം പാസാക്കിയിരുന്നു. ഒരു പ്രത്യേക മതവിഭാഗത്തെ ലക്ഷ്യമിട്ടുള്ള നിയമഭേദഗതി ഭരണഘടനാവിരുദ്ധമാണെന്ന് മുഖ്യമന്ത്രി പിണറായി വിജയൻ പറഞ്ഞിരുന്നു. അതേസമയം, പൗരത്വ നിയമ ഭേദഗതിക്കെതിരെ കേരളനിയമസഭയക്ക് പ്രമേയം പാസാക്കാൻ അധികാരമുണ്ടെന്നും എന്നാൽ അത് രാജ്യത്തെ നിയമത്തെ ബാധിക്കില്ലെന്നും കേന്ദ്ര നിയമമന്ത്രി രവിശങ്കർ പ്രസാദ് പറഞ്ഞു. പൗരത്വ വിഷയത്തിൽ നിയമം നിർമിക്കാൻ പാർലമെന്റിന് അധികാരമുണ്ടെന്നും മന്ത്രി വ്യക്തമാക്കിയിരുന്നു.