കൊറോണ വൈറസ് ബാധ; ചൈനയില്‍ മരണസംഖ്യ ഉയര്‍ന്നേക്കുമെന്ന് സൂചന

കൊറോണ വൈറസ് ബാധിച്ച് ചൈനയില്‍ മരിച്ചവരുടെ എണ്ണം 26 ആയി. 830 പേര്‍ക്ക് വൈറസ് ബാധ സ്ഥിരീകരിച്ചു. ദേശീയ ആരോഗ്യ കമ്മീഷന്‍ ആണ് കൊറോണ വൈറസ് ബാധ സംബന്ധിച്ച പുതിയ കണക്കുകള്‍ പുറത്തുവിട്ടത്. കൂടുതല്‍ പേര്‍ക്ക് വൈറസ് ബാധ സ്ഥിരീകരിച്ച സാഹചര്യത്തില്‍ മരണസംഖ്യ ഉയര്‍ന്നേക്കുമെന്നാണ് സൂചന.

ചൈനയില്‍ ദിനംപ്രതി രോഗലക്ഷണങ്ങളുമായി നിരവധി പേരാണ് ആശുപത്രികളിലെത്തുന്നത്. വൈറസിന്റെ പ്രഭവകേന്ദ്രമായ വുഹാനിലും സമീപനഗരങ്ങളിലും പൊതുഗതാഗതം താത്കാലികമായി നിര്‍ത്തിവച്ചു. ചൈനയ്ക്ക് പുറത്തേക്കും രോഗം പടരുന്ന സാഹചര്യത്തിലാണ് നടപടി. ദക്ഷിണകൊറിയയിലും ജപ്പാനിലും പുതിയ ഓരോ കേസുകള്‍ കൂടി റിപ്പോര്‍ട്ട് ചെയ്തതായാണ് വിവരം. വുഹാനില്‍ താമസിച്ചിരുന്ന 40 കാരനായ ജപ്പാന്‍ സ്വദേശിക്കാണ് രോഗം സ്ഥിരീകരിച്ചത്. സ്ഥിതി വിലയിരുത്താന്‍ ലോകാരോഗ്യ സംഘടന ജനീവയില്‍ ഇന്നലെ അടിയന്തര യോഗം ചേര്‍ന്നിരുന്നു. മരണസംഖ്യ ഉയരുന്ന സാഹചര്യത്തില്‍ ഇതുവരെ ചൈനയില്‍ ആരോഗ്യ അടിയന്തരാവസ്ഥ പ്രഖ്യാപിച്ചിട്ടില്ല.

Story Highlights-  Corona virus infection, Death toll in China