പൊലീസ് സേനയിലെ ക്രമക്കേട്: ആഭ്യന്തര സെക്രട്ടറി ഇന്ന് റിപ്പോർട്ട് സമർപ്പിച്ചേക്കും

സിഎജി റിപ്പോർട്ടിലെ പൊലീസിനെതിരായ പരാമർശങ്ങൾ അന്വേഷിക്കാൻ മുഖ്യമന്ത്രി ചുമതലപ്പെടുത്തിയ ആഭ്യന്തര സെക്രട്ടറി ബിശ്വാസ് മേത്ത ഇന്ന് റിപ്പോർട്ട് സമർപ്പിച്ചേക്കും. മുഖ്യമന്ത്രിക്കാണ് റിപ്പോർട്ട് കൈമാറുക. ചട്ടവിരുദ്ധമായി ഡിജിപി പ്രവർത്തിച്ചിട്ടുണ്ടോ എന്നാണ് ആഭ്യന്തര സെക്രട്ടറി പരിശോധിക്കുക . റിപ്പോർട്ട് മന്ത്രിസഭാ യോഗത്തിന്റെ പരിഗണനയ്ക്കും വന്നേക്കും.

അതേസമയം, ആഭ്യന്തര സെക്രട്ടറിയുടെ അന്വേഷണത്തോട് പ്രതിപക്ഷത്തിന് വിയോജിപ്പാണ് .സി ബി ഐ അന്വേഷണം വേണമെന്നാണ് പ്രതിപക്ഷ നിലപാട്.

ഇന്നലെയാണ് നിയമസഭയുടെ പബ്ലിക്ക് അക്കൗണ്ട്‌സ് സമിതിക്ക് വിശദീകരണം നൽകുന്നതിന് മുന്നോടിയായാണ് ആഭ്യന്തര സെക്രട്ടറിയോട് മുഖ്യമന്ത്രി റിപ്പോർട്ട് തേടിയത്. സ്വതന്ത്ര ഏജൻസി അന്വേഷിക്കണമെന്ന പ്രതിപക്ഷാവശ്യം തള്ളിയാണ് ആഭ്യന്തര വകുപ്പിനെതിരായ ആരോപണം അന്വേഷിക്കാൻ ആഭ്യന്തര സെക്രട്ടറിയെ മുഖ്യമന്ത്രി ചുമതലപ്പെടുത്തിയത്.

സിഎജി റിപ്പോർട്ടിൽ പ്രധാനമായും ചൂണ്ടിക്കാട്ടിയത് തോക്കും തിരകളും കാണാതായതും പൊലീസ് നവീകരണ ഫണ്ട് വകമാറ്റി ചെലവഴിച്ചതുമാണ്. ഇക്കാര്യത്തിൽ ബെഹ്‌റക്കെതിരെ നടപടി ആവശ്യമില്ലെന്ന നിലപാടിലായിരുന്നു സർക്കാർ.

Story Highlights- Home Secretary