ക്ഷാമം: കെഎസ്ഡിപിയുടെ നേതൃത്വത്തില്‍ നിര്‍മിക്കുക ഒരു ലക്ഷം ബോട്ടില്‍ സാനിറ്റൈസറുകള്‍

കൊറോണ പ്രതിരോധത്തിന്റെ ഭാഗമായി വ്യവസായ വകുപ്പിനു കീഴിലുള്ള കേരള ഡ്രഗ്‌സ് ആന്‍ഡ് ഫാര്‍മസ്യുട്ടിക്കല്‍സ് (കെഎസ്ഡിപി) ഹാന്‍ഡ് സാനിറ്റൈസര്‍ ഉത്പാദിപ്പിച്ചു. ലോകാരോഗ്യ സംഘടനയുടെ അംഗീകാരമുള്ള ഫോര്‍മുല പ്രകാരമാണ് സാനിറ്റൈസര്‍ തയാറാക്കിയത്. നിലവില്‍ സാനിറ്റൈസര്‍ കെഎസ് ഡിപി ഉത്പാദിപ്പിച്ചിരുന്നില്ല.

എന്നാല്‍, കൊറോണ പടരുന്ന സാഹചര്യത്തില്‍ വിപണിയില്‍ സാനിറ്റൈസര്‍ ക്ഷാമം പരിഹരിക്കുന്നതിനാണ് കെഎസ്ഡിപിയില്‍ നിര്‍മാണം തുടങ്ങിയത്. കെഎസ്ഡിപിയിലെ തന്നെ വിദഗ്ധരാണ് സാനിറ്റൈസറിന്റെ കോമ്പിനേഷന്‍ തയാറാക്കിയത്.
പത്തു ദിവസത്തിനകം ഒരു ലക്ഷം ബോട്ടില്‍ ഹാന്‍ഡ് സാനിറ്റൈസര്‍ നിര്‍മിക്കും. കേരള മെഡിക്കല്‍ സര്‍വീസസ് കോര്‍പറേഷന് (കെഎംഎസ്‌സിഎല്‍) വേണ്ടി ഒരു ലക്ഷം ബോട്ടിലാണ് ആദ്യഘട്ടത്തില്‍ നിര്‍മിക്കുന്നത്. ഹാന്‍ഡ് സാനിറ്റൈസറിന്റെ ആദ്യ ലോഡ് കൊല്ലം, തിരുവനന്തപുരം ജില്ലകളിലേക്ക് ഇന്നലെ അയച്ചു.
500 മില്ലി വരുന്ന 500 ബോട്ടിലുകളാണ് കെഎംഎസ്‌സിഎല്‍ വെയര്‍ഹൗസുകളില്‍ എത്തിച്ചത്. പൊതുവിപണിയില്‍ 100 മില്ലി സാനിറ്റൈസറിന് 150 മുതല്‍ 200 രൂപ വരെയാണ് വില. എന്നാല്‍ കെഎസ്ഡിപി ഉത്പാദിപ്പിക്കുന്ന അര ലിറ്റര്‍ സാനിറ്റൈസറിന് 125 രൂപമാത്രമാണ് വില.

Story Highlights: coronavirus, Covid 19