കൊവിഡ് 19: വിദഗ്ധ മെഡിക്കൽ സംഘം കാസർഗോട്ടേയ്ക്ക് തിരിച്ചു

കൊവിഡ് പ്രതിരോധത്തിന് തിരുവനന്തപുരം മെഡിക്കൽ കോളജിൽ നിന്ന് വിദഗ്ധ സംഘം കാസർഗോട്ടേയ്ക്ക് തിരിച്ചു. 28 അംഗസംഘത്തെ നയിക്കുന്നത് തിരുവനന്തപുരം മെഡിക്കൽ കോളജ് ഡെപ്യൂട്ടി സൂപ്രണ്ട് ഡോ. എസ് എസ് സന്തോഷ് കുമാറാണ്. ഡോക്ടർമാരും നഴ്‌സുമാരും സംഘത്തിലുണ്ട്.

സംസ്ഥാനത്ത് ഏറ്റവും അധികം കൊവിഡ് രോഗബാധിതരുള്ളത് കാസർഗോഡാണ്. ഇന്നലെ ആറ് പേർക്ക് കൂടി കാസർഗോഡ് രോഗം സ്ഥിരീകരിച്ചിരുന്നു. പുതുതായി വൈറസ് ബാധ സ്ഥിരീകരിച്ചവരിൽ 3 പേർ ദുബായിൽ നിന്നും ഒരാൾ നിസാമുദ്ദീനിൽ നിന്നും വന്ന ആളാണ്. രണ്ട് പേർക്ക് സമ്പർക്കത്തിലൂടെയുമാണ് രോഗം പടർന്നത്. കാസർഗോഡ് മുനിസിപ്പാലിറ്റി, ഉദുമ, മുളിയാർ, ബദിയടുക്ക സ്വദേശികൾക്കാണ് കൊവിഡ് സ്ഥിരീകരിച്ചത്. ഇതിൽ 4 പുരുഷന്മാരും 2 സ്ത്രീകളും ഉൾപ്പെടുന്നു.