കൊവിഡ് 19: ഡിബാലയുടെയും റുഗാനിയുടെയും ടെസ്റ്റ് റിസൽട്ട് നെഗറ്റീവ്; ഫെല്ലെയ്നി രോഗം ഭേദമായി ആശുപത്രി വിട്ടു

കൊവിഡ് 19 വൈറസ് ആശങ്ക ഫുട്ബോൾ ലോകത്തു നിന്ന് ഒഴിയുന്നു. ഫുട്ബോൾ താരങ്ങളിൽ പലരും രോഗമുക്തി നേടുകയാണ്. കാല്പന്ത് മേഖലയിൽ ആദ്യം വൈറസ് ബാധ സ്ഥിരീകരിച്ച യുവൻ്റസ് താരം ഡാനിയൽ റുഗാനിയുടെയും പൗളോ ഡിബാലയുടെയും ടെസ്റ്റ് റിസൽട്ട് നെഗറ്റീവായെന്നാണ് ഏറ്റവും പുതിയ വിവരം. അതേ സമയം, ഫെല്ലെയ്നി അസുഖം ഭേദമായി ആശുപത്രി വിട്ടു.

ഇറ്റാലിയൻ താരമായ റുഗാനിയുടെയും അർജൻ്റീന സ്ട്രൈക്കർ ഡിബാലയുടെയും ടെസ്റ്റ് റിസൽട്ട് നെഗറ്റീവായെങ്കിലും ഇരുവരും നിരീക്ഷണത്തിൽ തന്നെ തുടരും. ഇനിയും ഒരു ടെസ്റ്റ് റിസൽട്ട് കൂടി നെഗറ്റീവ് ആവാനുണ്ട്. നേരത്തെ, അസുഖം കുറഞ്ഞു വരുന്നുണ്ടെന്ന് ഡിബാല അറിയിച്ചിരുന്നു.

അതേ സമയം, മൗറോൻ ഫെല്ലെയ്നി ആശുപത്രി വിട്ടെന്ന് താരം തന്നെയാണ് അറിയിച്ചത്. കഴിഞ്ഞ മൂന്ന് ആഴ്ചയിലായി ചികിത്സയിൽ കഴിഞ്ഞിരുന്ന ഫെല്ലെയ്നി ആശുപത്രി അധികൃതർക്കും പരിചരിച്ചവർക്കും നന്ദി അറിയിച്ചു.

നേരത്തെ ഇറ്റാലിയൻ ഇതിഹാസ ഫുട്ബോളർ പൗളോ മാൽഡീനിയും മകൻ ഡാനി മാൽഡീനിയും കൊവിഡ് 19 ഭേദമായി ആശുപത്രി വിട്ടിരുന്നു. ഏതാനും ആഴ്ചകൾക്കു മുൻപാണ് ഇരുവർക്കും വൈറസ് ബാധ സ്ഥിരീകരിച്ചത്. ഇതേ തുടർന്ന് മുൻ എസി മിലാൻ താരമായ പൗളോയും നിലവിലെ എസി മിലാൻ സ്ക്വാഡിൽ ഉള്ള ഡാനിയും ചികിത്സയിലായിരുന്നു.

ആഴ്സണൽ സ്ട്രൈക്കർ മൈക്കൽ അർട്ടേറ്റയുടെയും ആസ്റ്റൺ വില്ല ഗോൾ കീപ്പർ പെപ്പെ റെയ്നയുടെയും ടെസ്റ്റ് റിസൽട്ടും നെഗറ്റീവായിരുന്നു.

കൊറോണ വൈറസ് വ്യാപനത്തിൻ്റെ പശ്ചാത്തലത്തിൽ ലോകവ്യാപകമായി ഫുട്ബോൾ ലീഗുകൾ നിർത്തിവച്ചിരുന്നു. ലീഗുകൾ പുനരാരംഭിക്കുന്നതിൽ അനിശ്ചിതത്വം തുടരുകയാണ്.

Story Highlights: dybala rugani felleini coronavirus negative