തമിഴ്‌നാട്ടിൽ 105 പേർക്ക് കൂടി കൊറോണ സ്ഥിരീകരിച്ചു

തമിഴ്‌നാട്ടിൽ 105 പേർക്ക് കൂടി കൊറോണ ബാധ സ്ഥിരീകരിച്ചു. ഇതോടെ സംസ്ഥാനത്ത് കൊവിഡ് ബാധിച്ചവരുടെ എണ്ണം 1477 ആയി. ഇന്ന് വൈറസ് ബാധ സ്ഥിരീകരിച്ചവരിൽ മൂന്ന് ഡോക്ടർമാർക്കും പൊലീസുകാരും രണ്ട് മാധ്യമപ്രവർത്തകരും ഉൾപ്പെടുന്നു. അതിനിടെ ഇന്ന് 46 പേർ രോഗമുക്തി നേടി ആശുപത്രി വിട്ടു. ഇതോടെ തമിഴ്നാട്ടിൽ ആശുപത്രിവിട്ടവരുടെ എണ്ണം 411 ആയി.

കൊറോണ വൈറസ് വ്യാപനത്തിന്റെ പശ്ചാത്തലത്തിൽ നിർത്തിവച്ച ഭൂമി രജിസ്ട്രേഷൻ നടപടികൾ പുനഃരാരംഭിക്കുമെന്ന് തമിഴ്നാട് സർക്കാർ പ്രഖ്യാപിച്ചിട്ടുണ്ട്. സാമൂഹ്യ അകലം പാലിച്ചുകൊണ്ട് ഒരു മണിക്കൂറിൽ നാല് രജിസ്ട്രേഷനുകൾ നടത്താനാണ് അനുമതി നൽകിയിട്ടുള്ളത്.

അതേസമയം, രാജ്യത്ത് 24 മണിക്കൂറിനിടെ 27 കൊവിഡ് മരണം സംഭവിച്ചതായി കേന്ദ്ര ആരോഗ്യമന്ത്രാലയം അറിയിച്ചു. 507 പേരാണ് ഇതുവരെ മരിച്ചത്. 24 മണിക്കൂറിനിടെ 1,334 പുതിയ കേസുകൾ റിപ്പോർട്ട് ചെയ്തതായും കേന്ദ്ര ആരോഗ്യമന്ത്രാലയം ജോയിന്റ് സെക്രട്ടറി വ്യക്തമാക്കിയിരുന്നു.