തെലങ്കാനയിൽ ലോക്ക് ഡ‍ൗൺ മെയ് ഏഴ് വരെ നീട്ടി

കൊവിഡ് വ്യാപനം തടയുന്നതിന് ലോക്ക് ഡൗൺ മെയ് ഏഴ് വരെ നീട്ടി തെലങ്കാന സർക്കാർ. സംസ്​ഥാനത്തെ സാഹചര്യങ്ങൾ മെയ്​ അഞ്ചിന്​ സർക്കാർ പരിശോധിച്ച ശേഷം തുടർ നടപടികൾ കൈക്കൊള്ളുമെന്നും മുഖ്യമന്ത്രി ചന്ദ്രശേഖർ റാവു പറഞ്ഞു.

മരുന്നു കമ്പനികളേയും അരി മില്ലുകളേയും ലോക്ക് ഡൗൺ കാലത്ത് പ്രവർത്തിക്കാൻ അനുവദിക്കും. ഒാൺലൈൻ ഭക്ഷണ വിതരണക്കാരടക്കമുള്ളവർക്ക്​ പ്രവർത്തിക്കാൻ അനുവാദമുണ്ടാകില്ല. സ്വിഗ്ഗി, സൊമാറ്റോ പോലുള്ളവർ വിതരണത്തിന്​ ശ്രമിച്ചാൽ നടപടി ഉണ്ടാകുമെന്നും ചന്ദ്രശേഖർ റാവു മുന്നറിയിപ്പ് നൽകി.

കുടിയേറ്റ തൊഴിലാളികൾക്ക്​ പ്രത്യേക റേഷൻ അനുവദിക്കും. കുടുംബ സമേതം തെലങ്കാനയിൽ കഴിയുന്ന കുടിയേറ്റ തൊഴിലാളികളാണെങ്കിൽ 1500 രൂപ ധന സഹായവും നൽകും. ജീവൻ അപകടത്തിലാക്കി സേവന രംഗത്തുള്ള പൊലീസുകാർക്ക്​ 10 ശതമാനം ശമ്പള വർധനവ് ഏർപ്പെടുത്തുമെന്നും മുഖ്യമന്ത്രി പറഞ്ഞു.

തെലങ്കാനയിൽ ഇതുവരെ 858 പേർക്കാണ്​ കൊവിഡ്​ സ്​ഥിരീകരിച്ചത്​. ഇതിൽ 21 പേർ മരിക്കുകയും 186 പേർക്ക്​ രോഗം ഭേദമാകുകയും ചെയ്​തു.