നാട്ടിൽ വെച്ച് ആദ്യം പോസിറ്റീവ്, പിന്നെ നെഗറ്റീവ്; ഇംഗ്ലണ്ടിലെത്തിയപ്പോൾ വീണ്ടും പോസിറ്റീവ്; പാക് താരം ഐസൊലേഷനിൽ
പാകിസ്താൻ ഓൾറൗണ്ടർ കാശിഫ് ഭട്ടിയുടെ കൊവിഡ് പരിശോധനാഫലം വീണ്ടും പോസിറ്റീവ്. ഇംഗ്ലണ്ടിലെത്തിയ മൂന്നാം സംഘത്തിൽ പെട്ട താരത്തിനാണ് അവിടെ വെച്ച് നടത്തിയ ടെസ്റ്റിൽ രോഗബാധ സ്ഥിരീകരിച്ചത്. ഹദർ അലി, ഇമ്രാൻ ഖാൻ എന്നിവർക്കൊപ്പമാണ് കാശിഫ് ഇംഗ്ലണ്ടിലേക്ക് തിരിച്ചത്.
ഇംഗ്ലണ്ട് പര്യടനത്തിനു മുന്നോടിയായി പാകിസ്താനിൽ വച്ച് നടത്തിയ പരിശോധനയിൽ കാശിഫ് ഭട്ടി ഉൾപ്പെടെ 10 താരങ്ങൾക്ക് കൊവിഡ് പരിശോധനാഫലം പോസിറ്റീവായിരുന്നു. പരിശോധനയിൽ നെഗറ്റീവായ താരങ്ങൾ ആദ്യം ഇംഗ്ലണ്ടിലെത്തി. തുടർന്ന് നടത്തിയ രണ്ടാം ഘട്ട പരിശോധനയിൽ ആറ് താരങ്ങളുടെ ഫലം നെഗറ്റീവായി. അപ്പോഴും കാശിഫ് ഭട്ടിയുടെ പരിശോധനാഫലം പോസിറ്റീവായിരുന്നു. രണ്ടാം പരിശോധനാഫലം നെഗറ്റീവായ താരങ്ങൾക്ക് മൂന്നാമതും പരിശോധന നടത്തി വീണ്ടും നെഗറ്റീവെന്ന് തെളിഞ്ഞതോടെ ഇവരും ഇംഗ്ലണ്ടിലേക്ക് തിരിച്ചു. രണ്ടാം പരിശോധനാഫലം പോസിറ്റീവായ താരങ്ങൾക്ക് മൂന്നാം വട്ടം നടത്തിയ പരിശോധനയിൽ, ഭട്ടിക്കൊപ്പം ഹൈദർ അലിക്കും ഇമ്രാൻ ഖാനും കൊവിഡ് ഫലം നെഗറ്റീവായി. തുടർന്നാണ് ഇവർ ഇംഗ്ലണ്ടിലേക്ക് തിരിച്ചത്. എന്നാൽ, ഇംഗ്ലണ്ടിലെത്തിയതിനു ശേഷം നടത്തിയ പരിശോധനയിൽ വീണ്ടും ഭട്ടി പോസിറ്റീവ് ആവുകയായിരുന്നു. ഇപ്പോൾ താരം ഐസൊലേഷനിലാണ്.
ജൂലായ് 30നാണ് പാകിസ്താൻ്റെ ഇംഗ്ലീഷ് പര്യടനം ആരംഭിക്കുക. മൂന്ന് ടെസ്റ്റുകളും മൂന്ന് ടി-20കളും അടങ്ങുന്ന പര്യടനം സെപ്തംബർ 2ന് അവസാനിക്കും. ജൂലായ് എട്ട് മുതൽ വെസ്റ്റ് ഇൻഡീസ് ഇംഗ്ലണ്ടിൽ പര്യടനം നടത്തും. മൂന്ന് ടെസ്റ്റുകൾ അടങ്ങുന്ന പരമ്പര ജൂലായ് 28 ന് അവസാനിക്കും.
Story Highlights – pakistan allrounder tested covid positive
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here
