തിരുവനന്തപുരം സ്വർണക്കടത്ത്; അറ്റാഷെയെ ചോദ്യം ചെയ്യാൻ എൻഐഎ

തിരുവനന്തപുരം സ്വർണക്കടത്ത് കേസിൽ അറ്റാഷെയേയും കോൺസുലേറ്റ് ജനറലിനേയും ചോദ്യം ചെയ്യാൻ എൻഐഎ നീക്കം തുടങ്ങി. ഇതിനായി കേന്ദ്ര വിദേശകാര്യ മന്ത്രാലയത്തിന് എൻഐഎ സംഘം കത്ത് നൽകി.

സ്വർണക്കടത്ത് കേസിൽ അറ്റാഷെയ്‌ക്കെതിരെ സ്വപ്‌ന സുരേഷും സരിത്തും മൊഴി നൽകിയിരുന്നു. സ്വർണക്കടത്ത് അറ്റാഷെയുടെ അറിവോടെയെന്നായിരുന്നു ഇരുവരും കസ്റ്റംസിന് നൽകിയ മൊഴി. ഇതേ കാര്യം തന്നെ പ്രതികൾ എൻഐഎയോടും ആവർത്തിച്ചതായാണ് വിവരം. ഇതിന്റെ അടിസ്ഥാനത്തിലാണ് അറ്റാഷെയേയും ഒപ്പം കോൺസുലേറ്റ് ജനറലിനേയും ചോദ്യം ചെയ്യാൻ എൻഐഎ തീരുമാനിച്ചത്. കേസിന്റെ അന്വേഷണവുമായി യുഎഇ സഹകരിക്കുന്നുണ്ടെന്നും അന്വേഷണ സംഘത്തിന് വേണമെങ്കിൽ അറ്റാഷെയെ ചോദ്യം ചെയ്യാമെന്നും കേന്ദ്ര വിദേശകാര്യസഹമന്ത്രി വി മുരളീധരൻ പറഞ്ഞതിന് പിന്നാലെയാണ് ഇത്തരത്തിൽ ഒരു വിവരം പുറത്തുവരുന്നത്. അറ്റാഷെയെ ചോദ്യം ചെയ്യുകയാണെങ്കിൽ അത് കേസിൽ നിർണായകമാകും.

Read Also : സ്വർണക്കടത്ത്; പ്രതികൾ അറ്റാഷെയേയും പറ്റിച്ചു എന്ന് മൊഴി

അതേസമയം, തിരുച്ചിറപ്പള്ളിയിൽ നിന്ന് എൻഐഎ കസ്റ്റഡിയിൽ എടുത്ത മൂന്ന് പേരുടെ അറസ്റ്റ് ഇന്ന് രേഖപ്പെടുത്തിയേക്കും. ഇന്നലെയാണ് കേസിലെ മൂന്ന് പ്രതികളെ അന്വേഷണ സംഘം കസ്റ്റഡിയിൽ എടുത്തത്.

Story Highlights – Thiruvananthapuram gold smuggling case, UAE consulate, Attache