ബ്രിട്ടനിൽ ആദ്യം കൊവിഡ് വാക്സിൻ സ്വീകരിച്ചവരിൽ ഇന്ത്യൻ വംശജനും

കൊവിഡ് വാക്സിൻ വിതരണം ആരംഭിച്ച ബ്രിട്ടനിൽ ആദ്യം വാക്സിൻ സ്വീകരിച്ചവരിൽ ഇന്ത്യൻ വംശജനും. വടക്കുകിഴക്കൻ ഇം​ഗ്ലണ്ടിൽ നിന്നുള്ള ഹരി ശുക്ലയാണ് ഫൈസർ-ബയോൺടെക്ക് വിതരണം ചെയ്ത വാക്സിൻ സ്വീകരിച്ചത്. ഇദ്ദേഹത്തിന് 87 വയസുണ്ട്.

ന്യൂകാസിലിലുള്ള ആശുപത്രിയിൽവച്ചാണ്​ ഹരി ശുക്ല വാക്​സിൻ സ്വീകരിച്ചത്​. ഇത് തന്റെ കടമയായി കരുതുന്നുവെന്നാണ് വാക്സിൻ സ്വീകരിച്ച ശേഷം അദ്ദേഹം പ്രതികരിച്ചത്. കൊവിഡ് അതിന്റെ അവസാനഘട്ടത്തിലേക്ക് നീങ്ങുകയാണ് എന്ന പ്രതീക്ഷ ഏറെ സന്തോഷം നൽകുന്നതാണെന്നും അദ്ദേഹം പറഞ്ഞു.

ചൊവ്വാഴ്​ചയാണ്​ ബ്രിട്ടനിൽ കൊവിഡ്​ വാക്​സിൻ വിതരണം ആരംഭിച്ചത്​. 80 വയസിന്​ മുകളിലുള്ളവർക്കും ആരോഗ്യപ്രവർത്തകർക്കുമാണ്​ ആദ്യഘട്ടത്തിൽ വാക്​സിൻ നൽകുന്നത്​. ഒരു വലിയ ലക്ഷ്യത്തിലേയ്ക്കുള്ള ചുവടുവയ്പെന്നാണ് വാക്സിൻ വിതരണത്തെ ബ്രിട്ടീഷ് പ്രധാനമന്ത്രി ബോറിസ് ജോൺസൻ വിശേഷിപ്പിച്ചത്.

Story Highlights – India-Origin Man Among 1st In World To Get Covid Vaccine