കുട്ടികളെ കൊവിഡ് കൂടുതൽ ബാധിക്കില്ല എന്ന് പറയാൻ സാധിക്കില്ല : മുഖ്യമന്ത്രി

കുട്ടികളെ കൊവിഡ് കൂടുതൽ ബാധിക്കില്ല എന്നൊരു പ്രചാരണം നടക്കുന്നുണ്ട്. ഒരു പരിധി വരെ ഇത് ശരിയാണ്. പ്രായാധിക്യമുള്ളവരെ ബാധിക്കുന്നത് പോലെ കുട്ടികളെ ബാധിക്കില്ല. പക്ഷേ രോ​ഗം വ്യാപകമായി പകരുമ്പോൾ അതിന് ആനുപാതികമായി കുട്ടികളേയും രോ​ഗം ബാധിക്കുമെന്ന് മുഖ്യമന്ത്രി പറഞ്ഞു. ഇത് ചിലപ്പോൾ രൂക്ഷമാകാം. അതുകൊണ്ട് ശ്രദ്ധിക്കണം. കൊവിഡ് ഭേതമായ കുട്ടികളിൽ മറ്റ് ചില രോ​ഗലക്ഷണങ്ങൾ കണ്ടുവരാറുണ്ട്. അതുകൊണ്ട് കുട്ടികളുമായി പുറത്ത് പോകുമ്പോൾ ശ്രദ്ധിക്കണം. കുട്ടികൾക്ക് ചുറ്റുമുള്ള രക്ഷാവലയം തീർക്കേണ്ടത് മുതിർന്നവരാണ്.

കുടുംബാംഗങ്ങൾക്കിടയിൽ രോഗം പടരുന്നത് കൂടുതലായി കാണുന്നുവെന്നും മുഖ്യമന്ത്രി പിണറായി വിജയൻ പറഞ്ഞു. രോ​ഗബാധിതർ റൂം ക്വാറന്റീൻ പാലിക്കണം. ഇത് മറ്റു കുടുംബാം​ഗങ്ങളിലേക്ക് രോ​ഗം പടരുന്നത് തടയും. അടച്ചുമൂടിയ ഇടങ്ങളിൽ രോഗം വേഗം പകരും. ഓഫിസുകൾ, വാഹനങ്ങൾ, തുടങ്ങിയ അടഞ്ഞ സ്ഥലത്ത് ആളുകൾ ശ്രദ്ധിക്കണമെന്നും, മാസ്ക് നിർബന്ധമായും ധരിക്കണമെന്നും മുഖ്യമന്ത്രി പറഞ്ഞു.