ഫ്രണ്ട്സ് റീയൂണിയൻ ഈ മാസം 27ന്; മലാല യൂസുഫ്സായ് അടക്കം പ്രമുഖർ ഗസ്റ്റ് റോളുകളിൽ; ഇന്ത്യയിൽ ലഭ്യമാവാൻ വൈകും

ലോകത്ത് ഏറ്റവുമധികം ജനപ്രീതിയാർജിച്ച സിറ്റ്കോം എന്ന വിശേഷണമുള്ള ‘ഫ്രണ്ട്സിൻ്റെ’ റീയൂണിയൻ എപ്പിസോഡ് ഈ മാസം 27ന് പുറത്തിറങ്ങും. എച്ച്ബിഓ മാക്സ് ഒടിടി സംവിധാനത്തിലൂടെയാണ് റീയൂണിയൻ എപ്പിസോഡ് സ്ട്രീം ചെയ്യുക. എച്ച്ബിഓ മാക്സ് നിലവിൽ ഇന്ത്യയിൽ ലഭ്യമല്ല. അതുകൊണ്ട് തന്നെ ഇന്ത്യക്കാർക്ക് എപ്പിസോഡ് കാണാൻ കാത്തിരിക്കേണ്ടിവരും. ഡേവിഡ് ബെക്കാം, ലേഡി ഗാഗ തുടങ്ങി നിരവധി പ്രമുഖർ എപ്പിസോഡിൽ ഗസ്റ്റ് റോളുകളിൽ എത്തുമെന്ന് അണിയറ പ്രവർത്തകർ അറിയിച്ചു. എപ്പിസോഡ് ടീസർ പുറത്തുവിട്ടിട്ടുണ്ട്.

ഡേവിഡ് ബെക്കാം, ജസ്റ്റിൻ ബീബർ, ബിടിഎസ്, ജെയിംസ് കോർഡൻ, സിൻഡി ക്രോഫോർഡ്, ലേഡി ഗാഗ, മിൻഡി കലിങ്, റീസ് വിതർസ്പൂൺ, മലാല യൂസുഫ്സായ് തുടങ്ങി ഒരുപിടി പ്രമുഖരാണ് ഗസ്റ്റ് റോളുകളിൽ എത്തുന്നത്. ഇവർക്കൊപ്പം ഫ്രണ്ട്സിലെ കേന്ദ്രകഥാപാത്രങ്ങളെ അവതരിപ്പിച്ച ജെന്നിഫർ ആനിസ്റ്റൺ, കോർട്നി കോക്സ്, ലിസ കുദ്രോ, മാറ്റ് ലിബ്ലാങ്ക്, മാത്യു പെറി, ഡേവിഡ് ഷ്വിമ്മർ എന്നിവരും അണിനിരക്കും.

വാർണർ ബ്രോസ് സ്റ്റുഡിയോസിലായിരുന്നു എപ്പിസോഡിൻ്റെ ചിത്രീകരണം. മുൻപ് ഫ്രണ്ട്സ് ചിത്രീകരിച്ച ലൊക്കേഷനുകൾ സ്പെഷ്യൽ എപ്പിസോഡിനായി വീണ്ടും നിർമിച്ചിരുന്നു. ജെന്നിഫർ ആനിസ്റ്റൺ, കോർട്നി കോക്സ്, ഡേവിഡ് ഷ്വിമ്മർ, ലിസ കുദ്രോ, മാത്യു പെറി, മാറ്റ് ലെബ്ലാങ്ക് എന്നിവർ തന്നെയാണ് സ്പെഷ്യൽ എപ്പിസോഡിലും സ്ക്രീനിലെത്തുന്നത്. ഇവർക്കൊപ്പം മറ്റാരൊക്കെ ഉണ്ടെന്നത് വ്യക്തമല്ല.

1994നു സംപ്രേഷണം ആരംഭിച്ച ഫ്രണ്ട്സ് 10 സീസണുകൾ കൊണ്ട് ലോകമൊട്ടാകെ ആരാധകരെ ഉണ്ടാക്കിയെടുത്തു എന്നതിനപ്പുറം ഇപ്പോഴും മടുപ്പില്ലാതെ ആളുകൾ കാണുന്നുണ്ട്. റോസ്, ചാൻഡ്‌ലർ, റോസിൻ്റെ സഹോദരിയും ചാൻഡ്‌ലറുടെ ഭാര്യയുമായ മോണിക്ക, ജോയ്, റോസിൻ്റെ ഭാര്യ റേച്ചൽ, ഫീബി എന്നീ ആറു സുഹൃത്തുക്കളുടെ ജീവിതമാണ് സീരീസ് പറയുന്നത്.

Story Highlights: Friends reunion in may 27th teaser out