ഓക്സിജൻ പുറത്തുവിടുന്ന ഒരേയൊരു ജീവി പശുവാണെന്നാണ് ശാസ്ത്രത്തിന്റെ വിശ്വാസം: അലഹബാദ് ഹൈക്കോടതി

ഓക്സിജൻ പുറത്തുവിടുന്ന ഒരേയൊരു ജീവി പശുവാണെന്നാണ് ശാസ്ത്രത്തിന്റെ വിശ്വാസം എന്ന് അലഹബാദ് ഹൈക്കോടതി. ജസ്റ്റിസ് ശേഖർ കുമാർ യാദവാണ് ഇത്തരത്തിൽ നിരീക്ഷണം നടത്തിയത്. പശുക്കൊലയുമായി ബന്ധപ്പെട്ട് കഴിഞ്ഞ ദിവസം പ്രതി സമർപ്പിച്ച ജാമ്യാപേക്ഷ തള്ളിക്കൊണ്ടായിരുന്നു കോടതി നിരീക്ഷണം. പശുവിനെ ഇന്ത്യയുടെ ദേശീയ മൃഗമായി പ്രഖ്യാപിക്കണമെന്ന ഉത്തരവിലായിരുന്നു ഈ നിരീക്ഷണം. (Scientists cow exhales oxygen)

പശുവിൻ്റെ മൂത്രം, ചാണകം, പാൽ, തൈര്, വെണ്ണ എന്നിവ ചേർത്ത് ഉണ്ടാക്കുന്ന പഞ്ചഗവ്യ നിരവധി രോഗങ്ങൾക്കുള്ള മറുമരുന്നാണെന്നും ഉത്തരവിൽ കോടതി സൂചിപ്പിച്ചു.

സംഭാൽ ജില്ലക്കാരനായ ജാവേദ് ആണ് കേസിലെ പ്രതി. ഇയാളും പങ്കാളികളും ഖിലേന്ദ്ര സിംഗ് എന്നൊരാളിൽ നിന്ന് പശുവിനെ മോഷ്ടിച്ച് കൊന്നു എന്നതായിരുന്നു കേസ്. ഇത് ആദ്യമായല്ല ജാവേദ് ഇതേ കുറ്റകൃത്യം ചെയ്യുന്നതെന്നും ജാമ്യം അനുവദിച്ചാൽ ഇത് ആവർത്തിക്കുമെന്നും കോടതി ചൂണ്ടിക്കാട്ടി.

Read Also : പശുവിനെ ദേശീയ മൃഗമായി പ്രഖ്യാപിക്കേണ്ടതാണെന്ന് അലഹബാദ് ഹൈക്കോടതി

“ഹിന്ദു മത പ്രകാരം ഒരു പശുവിനുള്ളിൽ 33 തരം ദൈവങ്ങളും ദേവതകളുമുണ്ട്. ഭഗവാൻ കൃഷ്ണന് തൻ്റെ എല്ലാ അറിവും ലഭിച്ചത് പശുവിൻ്റെ പാദത്തിൽ നിന്നാണ്. പശുവിനെയോ കാളയെയോ കൊല്ലുന്നത് ഒരു മനുഷ്യനെ കൊല്ലുന്നതിനു തുല്യമാണെന്നാണ് യേശുക്രിസ്തു പറഞ്ഞത്. നിങ്ങൾക്ക് എന്നെ കൊല്ലാം, പശുവിനെ വേദനിപ്പിക്കരുതെന്നാണ് ബാല ഗംഗാധർ തിലക് പറഞ്ഞിട്ടുണ്ട്. പശുക്കൊല പൂർണമായി നിരോധിക്കണമെന്ന് പണ്ഡിറ്റ് മദൻ മോഹൻ മാളവ്യ പറഞ്ഞിരുന്നു. പശു മനുഷ്യൻ്റെ സുഹൃത്താണെന്ന് ബുദ്ധ ഭഗവാൻ പറഞ്ഞു. ജൈനർ പശുവിനെ സ്വർഗം എന്നാണ് വിളിക്കുന്നത്. പശു മാത്രമാണ് ഓക്സിജൻ പുറത്തുവിടുന്ന ജീവിയെന്ന് ശാസ്ത്രം വിശ്വസിക്കുന്നു”- ഉത്തരവിൽ പറയുന്നു.

“നൂറ്റാണ്ടുകളായി ഹിന്ദുക്കൾ പശുവിനെ ആരാധിക്കുന്നു. അഹിന്ദുക്കൾക്കും ഇതറിയാം. അതുകൊണ്ടാണ് മുഗൾ ഭരണകാലത്ത് അഹിന്ദുക്കളായ ഭരണാധികാരികൾ പശുക്കൊലക്കെതിരെ നിലപാടെടുത്തത്. രാജ്യത്തെ മുസ്ലിം നേതൃത്വത്തിൻ്റെ ഏറിയ പങ്കും പശുക്കൊലക്കെതിരാണ്.”- കോടതി കൂട്ടിച്ചേർത്തു.

പശുവിന് ഭരണഘടനാ അവകാശങ്ങള്‍ നല്‍കുന്ന ബില്‍ പാര്‍ലമെന്റില്‍ കൊണ്ടുവരണമെന്നും കോടതി പറഞ്ഞു. ‘ഇന്ത്യന്‍ സംസ്‌കാരത്തിന്റെ അവിഭാജ്യ ഘടകമാണ് പശു. പശുക്കള്‍ക്ക് ക്ഷേമമുണ്ടായാല്‍ രാജ്യത്തിനും അഭിവൃദ്ധിയുണ്ടാകുമെന്നും കോടതി കൂട്ടിച്ചേർത്തു.

Story Highlight: Scientists cow inhales exhales oxygen