ന്യൂസീലൻഡിനു പിന്നാലെ ഇംഗ്ലണ്ടും പാകിസ്താൻ പര്യടനത്തിൽ നിന്ന് പിന്മാറിയേക്കും

ന്യൂസീലൻഡിനു പിന്നാലെ ഇംഗ്ലണ്ടും പാക് പര്യടനത്തിൽ നിന്ന് പിന്മാറാനൊരുങ്ങുന്നു. അടുത്ത മാസം നടത്താനിരിക്കുന്ന പര്യടനത്തിൽ നിന്ന് ഇംഗ്ലണ്ട് പിന്മാറിയേക്കുമെന്നാണ് റിപ്പോർട്ട്. ഇക്കാര്യത്തിൽ ഏറെ വൈകാതെ ഇംഗ്ലണ്ട് ആൻഡ് വെയിൽസ് ക്രിക്കറ്റ് ബോർഡ് തീരുമാനമെടുക്കും. ഇംഗ്ലണ്ട് കൂടി പിന്മാറിയാൽ തങ്ങളുടെ ഹോം മത്സരങ്ങൾക്കുള്ള വേദി വീണ്ടും യുഎഇയിലേക്ക് മാറ്റാൻ പിസിബി നിർബന്ധിതരാവും. (England tour Pakistan doubt)

അതേസമയം, പര്യടനത്തിൽ നിന്ന് പിന്മാറിയ ന്യൂസീലൻഡിനെതിരെ ഐസിസിക്ക് പരാതി നൽകുമെന്ന് പാകിസ്താൻ ക്രിക്കറ്റ് ബോർഡ്. ന്യൂസീലൻഡ് ക്രിക്കറ്റ് ബോർഡിൻ്റെ നടപടിക്കെതിരെ ഐസിസിയെ സമീപിക്കുമെന്ന് പിസിബി ചെയർമാൻ റമീസ് രാജ പറഞ്ഞു. തൻ്റെ ട്വിറ്റർ ഹാൻഡിലിലൂടെയാണ് റമീസ് രാജ മുന്നറിയിപ്പ് നൽകിയത്.

സുരക്ഷാ ഭീഷണി ചൂണ്ടിക്കാണിച്ചാണ് ആദ്യ ഏകദിനം ആരംഭിക്കാൻ മണിക്കൂറുകൾ മാത്രം ബാക്കിനിൽക്കെ പര്യടനത്തിൽ നിന്ന് കിവീസ് പിന്മാറിയത്. മൂന്ന് ഏകദിനങ്ങളും രണ്ട് ടി-20 മത്സരങ്ങളുമാണ് പര്യടനത്തിൽ ഉണ്ടായിരുന്നത്.

Read Also : പര്യടനത്തിൽ നിന്ന് ന്യൂസീലൻഡ് പിന്മാറിയ സംഭവം; ഐസിസിക്ക് പരാതി നൽകുമെന്ന് പിസിബി

മത്സരത്തിനായി ഇരു താരങ്ങളും ഗ്രൗണ്ടിൽ ഇറങ്ങാതിരുന്നത് ആശയക്കുഴപ്പമുണ്ടാക്കിയിരുന്നു. കാണികളെ സ്റ്റേഡിയത്തിലേക്ക് കടത്തിവിടാതിരുന്നത് സംശയത്തിനിടയാക്കി. തുടർന്ന് സംഭവത്തിൽ വ്യക്തത വരുത്തി ന്യൂസീലൻഡ് ക്രിക്കറ്റ് രംഗത്തുവരികയായിരുന്നു. സർക്കാർ നിർദ്ദേശപ്രകാരം പാകിസ്താനിലെ സുരക്ഷാ ഏർപ്പാടുകളിൽ സംശയമുണ്ടെന്ന് അധികൃതർ അറിയിച്ചതിനാൽ പര്യടനത്തിൽ നിന്ന് പിന്മാറാൻ ന്യൂസീലൻഡ് തീരുമാനിക്കുകയായിരുന്നു എന്ന് ക്രിക്കറ്റ് ബോർഡ് അറിയിച്ചു. സുരക്ഷാ ഭീഷണിയെപ്പറ്റി കൂടുതൽ വിവരിക്കാനില്ലെന്നും ബോർഡ് വ്യക്തമാക്കി.

അതേസമയം, പഴുതടച്ച സുരക്ഷയാണ് ഒരുക്കിയിരുന്നതെന്ന് പാകിസ്താൻ ക്രിക്കറ്റ് ബോർഡ് പറഞ്ഞു. പാകിസ്താൻ ഒരുക്കിയ സുരക്ഷാ ക്രമീകരണങ്ങളിൽ ന്യൂസീലൻഡ് തൃപ്തരായിരുന്നു. ഇമ്രാൻ ഖാൻ വ്യക്തിപരമായി ജസീന്ത ആർഡനോട് സംസാരിച്ചിരുന്നു. മികച്ച സുരക്ഷയാണ് ഒരുക്കിയിരിക്കുന്നതെന്നും ഒരു തരത്തിലുള്ള ഭീതിയും വേണ്ടെന്നും ഇമ്രാൻ ഖാൻ വ്യക്തമാക്കി. അവസാന നിമിഷം പര്യടനത്തിൽ പിന്മാറിയത് നിരാശയുണ്ടാക്കുന്നു എന്നും പിസിബി വ്യക്തമാക്കി.

കഴിഞ്ഞ ദിവസമാണ് മുൻ ദേശീയ താരവും കമൻ്റേറ്ററുമായ റമീസ് രാജ പിസിബി ചെയർമാനായി തെരഞ്ഞെടുക്കപ്പെട്ടത്. മുൻ ചെയർമാനായ ഇഹ്‌സാൻ മാനിയുടെ കാലാവധി അവസാനിച്ചതോടെ മുൻ താരത്തെ ചെയർമാനായി തിരഞ്ഞെടുക്കാൻ തീരുമാനിക്കുകയായിരുന്നു.

Story Highlights : England tour of Pakistan in doubt