രോഹിത് ശർമ്മ അടുത്ത മത്സരത്തിൽ കളിക്കും: മഹേല ജയവർധനെ

മുംബൈ ഇന്ത്യൻസ് ക്യാപ്റ്റൻ രോഹിത് ശർമ്മ അടുത്ത മത്സരത്തിൽ കളിക്കുമെന്ന് ടീം പരിശീലകൻ മഹേല ജയവർധനെ. പൂർണ ഫിറ്റ് അല്ലാതിരുന്ന താരം ഇന്നലെ ചെന്നൈ സൂപ്പർ കിംഗ്സിനെതിരെ നടന്ന മത്സരത്തിൽ താരം കളിച്ചിരുന്നില്ല. സെപ്തംബർ 23ന് കൊൽക്കത്ത നൈറ്റ് റൈഡേഴ്സിനെതിരെയാണ് മുംബൈയുടെ അടുത്ത മത്സരം. (Rohit Sharma Mahela Jayawardene)

“രോഹിത് പരിശീലനത്തിൽ പങ്കെടുക്കുന്നുണ്ട്. ഇംഗ്ലണ്ടിൽ നിന്ന് എത്തിയ രോഹിതിന് കുറച്ച് ദിവസം കൂടി നൽകാമെന്ന് ഞങ്ങൾ തീരുമാനിക്കുകയായിരുന്നു. അടുത്ത മത്സരത്തിൽ അദ്ദേഹം കളിക്കും. ഹർദ്ദിക്കിന് ചെറിയ പരുക്കുണ്ട്. സാരമുള്ളതല്ല. ഏതാനും ദിവസങ്ങൾക്കുള്ളിൽ ഹർദ്ദിക്കും കളിക്കും.”- മഹേല പറഞ്ഞു.

Read Also : റായുഡുവിന്റെ പരുക്ക് സാരമുള്ളതല്ലെന്ന് ചെന്നൈ സൂപ്പർ കിംഗ്സ്

മത്സരത്തിൽ മുംബൈ ഇന്ത്യൻസിനെ ചെന്നൈ സൂപ്പർ കിംഗ്സ് 20 റൺസിനു തോൽപിച്ചു. 3 വിക്കറ്റ് നഷ്ടത്തിൽ 7 റൺസ്, 4 വിക്കറ്റ് നഷ്ടത്തിൽ 24 റൺസ് എന്ന നിലയിൽ പതറിയ ചെന്നൈയെ ഋതുരാജ് ഗെയ്ക്‌വാദിൻ്റെ തകർപ്പൻ ബാറ്റിംഗാണ് കരകയറ്റിയത്. രവീന്ദ്ര ജഡേജ, ഡ്വെയിൻ ബ്രാവോ എന്നിവരും ചെന്നൈക്കായി തിളങ്ങി. മത്സരത്തിൽ ടോസ് നേടി ബാറ്റിങിനിറങ്ങിയ ചെന്നൈ 20 ഓവറിൽ 6 വിക്കറ്റ് നഷ്ടത്തിൽ 156 റൺസ് നേടി. മറുപടി ബാറ്റിങ്ങിനിറങ്ങിയ മുംബൈയ്ക്ക് 20 ഓവറിൽ എട്ടുവിക്കറ്റ് നഷ്ടത്തിൽ 136 റൺസേ നേടാനായുള്ളൂ.

ഓപ്പണർ ഋതുരാജ് ഗെയ്ഗ്വാദാണ് ചെന്നൈയുടെ ടോപ് സ്‌കോറർ. താരം 52 പന്തിൽ നിന്ന് 88 റൺസ് അടിച്ചെടുത്തു. രവീന്ദ്ര ജഡേജ 26ഉം ഡ്വയിൻ ബ്രാവോ 23ഉം നേടി. കളിയിൽ പതിനൊന്ന് ഓവറുകൾ പൂർത്തിയായപ്പോൾ നാല് വിക്കറ്റ് നഷ്ടത്തിൽ 48 റൺസ് എന്ന അവസ്ഥയിലായിരുന്നു ചെന്നൈ. പിന്നീടുള്ള ഓവറുകളിൽ ഋതുരാജിന്റെ പ്രകടനം നിർണായകമായി. ആറാം വിക്കറ്റ് കൂട്ടുകെട്ടൽ ജഡേജയും ഋതുരാജും ചേർന്ന് 81 റൺസ് അടിച്ചുകയറ്റി.

സൗരവ് തിവാരിയാണ് മുംബൈയുടെ ടോപ് സ്‌കോറർ. നാൽപത് പന്തുകളിൽ 5 ഫോറുകളടക്കം 50 റൺസിൽ പുറത്താവാതെ നിന്നു. ക്വിൻ്റൺ ഡികോക്ക് പന്ത്രണ്ട് പന്തിൽ നിന്ന് 17 റൺസും അൻമോൽപ്രീത് സിംഗ് 14 പന്തിൽ 16ഉം ഇഷാൻ കിഷൻ 10 പന്തിൽ 11ഉം പൊള്ളാർഡ് 14 പന്തിൽ 15ഉം ആദംമിൽനേ 15 പന്തിൽ 15റൺസുമാണ് മുംബൈക്ക് വേണ്ടി നേടിയത്.

Story Highlights : Rohit Sharma Mahela Jayawardene mumbai indians