വാക്സിനെടുത്താൽ 50,000 രൂപയുടെ സ്മാർട്ട് ഫോൺ; പ്രഖ്യാപനവുമായി രാജ്‌കോട്ട് നഗരസഭ

സംസ്ഥാനത്ത് കൊവിഡ് വാക്സിനേഷൻ പ്രോത്സാഹിപ്പിക്കുന്നതിന്റെ ഭാഗമായി പുതിയ നീക്കവുമായി ഗുജറാത്തിലെ രാജ്‌കോട്ട് നഗരസഭ. മെഗാ വാക്സിനേഷൻ പ്രോഗ്രാമാണ് രാജ്‌കോട്ട് നഗരസഭ ആരംഭിച്ചത്. ഇതിന്റെ ഭാഗമായി ഡിസംബർ 4 നും 10 നും ഇടയിൽ രണ്ടാം ഡോസ് വാക്സിൻ എടുക്കുന്നവരിൽ നിന്നും നറുക്കെടുത്ത് ഒരാൾക്ക് 50,000 രൂപയുടെ സ്‌മാർട്ട്‌ഫോൺ സമ്മാനമായി നൽകാൻ പൗരസമിതി പ്രഖ്യാപിച്ചിട്ടുണ്ട്. മെഗാ വാക്​സിനേഷന്‍ ക്യാമ്പിലേക്ക്​ കൂടുതല്‍ പേരെ എത്തിക്കാനാണ്​ നീക്കം.

മുന്‍സിപ്പല്‍ കമ്മീഷണര്‍ അമിത്​ അറോറയാണ്​ ഇത് സംബന്ധിച്ച പ്രഖ്യാപനം നടത്തിയത്. കൂടാതെ, കൂടുതൽ ആളുകൾക്ക് വാക്സിനേഷൻ നൽകുന്ന ആരോഗ്യ കേന്ദ്രത്തിന് നഗരസഭ 21,000 രൂപ പാരിതോഷികവും പ്രഖ്യാപിച്ചിട്ടുണ്ട്. രാജ്‌കോട്ടിൽ ഇനി 1.82 ലക്ഷം പേര്‍ രണ്ടാം ഡോസ്​ വാക്​സിന്‍ സ്വീകരിക്കാനുണ്ട്​.

Read Also : ഉറക്ക പ്രശ്നങ്ങൾ: ഇന്ത്യയിൽ 64 ശതമാനം ആളുകളും ആവശ്യത്തിന് ഉറങ്ങുന്നില്ലെന്ന് സർവേ റിപ്പോർട്ട്

പരമാവധി ആളുകൾക്ക് വാക്സിനേഷൻ നൽകുന്നതിന് നഗരത്തിലെ 22 ആരോഗ്യ കേന്ദ്രങ്ങൾ 12 മണിക്കൂർ (രാവിലെ 9 മുതൽ രാത്രി 9 വരെ) പ്രവർത്തിക്കും. അടുത്തിടെ ഗുജറാത്തിലെ മറ്റൊരു നഗരവും സമാനമായ പ്രഖ്യാപനം നടത്തിയിരുന്നു. വാക്​സിന്‍ സ്വീകരിക്കുന്നവര്‍ക്ക്​ നറുക്കെടുപ്പിലൂടെ 60,000 രൂപയുടെ സ്​മാര്‍ട്ട്​ഫോണ്‍ സമ്മാനമായി നല്‍കുമെന്നായിരുന്നു അഹമ്മദാബാദ്​ നഗരസഭയുടെ പ്രഖ്യാപനം.

ഡിസംബർ 1 നും 7 നും ഇടയിൽ കൊവിഡ് വാക്‌സിൻ രണ്ടാം ഡോസ് എടുക്കുന്നവർക്കാണ് സമ്മാനം കിട്ടുകയെന്നാണ് അധികൃതർ അറിയിച്ചത്. അതേസമയം, ശനിയാഴ്ച ഗുജറാത്തിൽ ഒമിക്രോൺ ആദ്യ കേസ് റിപ്പോർട്ട് ചെയ്തു. സിംബാബ്‌വെയിൽ നിന്ന് സംസ്ഥാനത്തെത്തിയ 72 കാരനായ ഒരാൾക്കാണ് ഒമിക്രോൺ സ്ഥിരീകരിച്ചത്.

Story Highlights :Rajkot Municipal Corporation-launched a mega-vaccination programme