കൊവിഡ് മുക്തരായ മിച്ചൽ മാർഷും ടിം സെയ്ഫെർട്ടും ഡൽഹി ക്യാപിറ്റൽസ് ക്യാമ്പിൽ തിരികെയെത്തി

കൊവിഡ് മുക്തരായ ഓസീസ് ഓൾറൗണ്ടർ മിച്ചൽ മാർഷും ന്യൂസീലൻഡ് വിക്കറ്റ് കീപ്പർ ടിം സെയ്ഫെർട്ടും ഡൽഹി ക്യാപിറ്റൽസ് ക്യാമ്പിൽ തിരികെയെത്തി. ക്വാറൻ്റീൻ കാലാവധി പൂർത്തിയാക്കിയ ഇരുവരും പരിശീലനം പുനരാരംഭിച്ചു. ഇരുവരുടെയും പരിശീലനത്തിൻ്റെ ചിത്രങ്ങൾ ഡൽഹി ക്യാപിറ്റൽസ് തന്നെ തങ്ങളുടെ ട്വിറ്റർ ഹാൻഡിലിൽ പങ്കുവച്ചു.

കഴിഞ്ഞ ആഴ്ചയാണ് ഇരുവർക്കും കൊവിഡ് സ്ഥിരീകരിച്ചത്. മിച്ചൽ മാർഷറിനെ ആശുപത്രിയിൽ പ്രവേശിച്ചിരുന്നു.

രണ്ട് താരങ്ങൾ ഉൾപ്പെടെ ആറ് പേർക്കാണ് ഡൽഹി ക്യാമ്പിൽ കൊവിഡ് പോസിറ്റീവായത്. ഈ മാസം 15ന് ടീം ഫിസിയോ പാട്രിക്ക് ഫർഹത്തിനാണ് ഡൽഹി ക്യാമ്പിൽ ആദ്യമായി കൊവിഡ് സ്ഥിരീകരിച്ചത്. 16ന് മസാജ് തെറാപിസ്റ്റ് ചേതൻ കുമാർ പോസിറ്റീവായി. 19ന് മിച്ചൽ മാർഷ്, ടീം ഡോക്ടർ അഭിജിത് സാൽവി, സോഷ്യൽ മീഡിയ കണ്ടൻ്റ് ടീം മാനേജർ ആകാശ് മാനെ എന്നിവർക്കും കൊവിഡ് ബാധ സ്ഥിരീകരിച്ചു. 21നാണ് സെയ്ഫെർട്ട് കൊവിഡ് ബാധിതനായത്.

Story Highlights: Mitchell Marsh Tim Seifert Recovered Covid