യുദ്ധം അവസാനിപ്പിക്കണം, ഇന്ത്യ സമാധാനത്തിനൊപ്പം; മോദി

റഷ്യ യുക്രൈൻ യുദ്ധത്തിൽ ഇരു രാജ്യവും തോൽക്കുമെന്ന് ഇന്ത്യൻ പ്രധാനമന്ത്രി നരേന്ദ്ര മോദി. ചർച്ചയിലൂടെ പ്രശ്‌നത്തിന് പരിഹാരം കാണുമെന്നാണ് ഇന്ത്യ പ്രതീക്ഷിക്കുന്നത്. യൂറോപ്യന്‍ പര്യടനത്തില്‍ ജര്‍മ്മന്‍ ചാന്‍സിലറുമായി നടത്തിയ കൂടിക്കാഴ്ചയ്ക്ക് ശേഷം നടത്തിയ സംയുക്ത പ്രസ്താവനയിലായിരുന്നു പ്രധാനമന്ത്രി രാജ്യത്തിന്റെ നിലപാട് വ്യക്തമാക്കിയത്.

യുദ്ധത്തില്‍ ആരും ജേതാക്കളാകുന്നില്ല. ആഗോള സമാധാനത്തിന് തന്നെ യുദ്ധം വെല്ലുവിളിയാണ്. ഇന്ത്യ സമാധാനത്തിനൊപ്പമാണ്. ഇരു രാജ്യങ്ങളും യുദ്ധം അവസാനിപ്പിക്കാൻ തയ്യാറാകണമെന്നും മോദി ജർമ്മനിയിൽ പറഞ്ഞു. യുദ്ധം അവസാനിപ്പിക്കണമെന്ന് തുടക്കത്തിലേ ഇന്ത്യ ആവശ്യപ്പെട്ടതാണെന്നും മോദി കൂട്ടിച്ചേർത്തു. മൂന്ന് ദിവസം നീണ്ടു നില്‍ക്കുന്നതാണ് പ്രധാനമന്ത്രി നരേന്ദ്ര മോദിയുടെ യൂറോപ്യന്‍ പര്യടനം.

കാലാവസ്ഥാ വ്യതിയാനവുമായി ബന്ധപ്പെട്ട് ഇന്ത്യ സ്വീകരിച്ച നടപടികളെ ജര്‍മ്മന്‍ ചാന്‍സലര്‍ ഒലഫ് ഷോള്‍സ് അഭിനന്ദിച്ചു. ഉഭയകക്ഷി സഹകരണത്തിന്‍റെ 70ാം വര്‍ഷത്തില്‍ വ്യാപാരം, ഊര്‍ജ്ജം, വിദ്യാഭ്യാസം തുടങ്ങിയ മേഖലകളില്‍ കൂടുതല്‍ സഹകരിക്കാന്‍ മോദി-ഷോൾസ് കൂടിക്കാഴ്ചയില്‍ തീരുമാനമായി. നാളെ കോപ്പന്‍ ഹേഗനില്‍ നടക്കുന്ന ഇന്ത്യ-നോര്‍ഡിക്ക് ഉച്ചകോടിയില്‍ പ്രധാനമന്ത്രി പങ്കെടുക്കും.

Story Highlights: india stands for peace pm modi