കെ.എസ്.ആർ.ടി.സി ബോണ്ട് സർവീസ്; ടിക്ക​റ്റ് നിരക്ക് കുത്തനെ കൂട്ടിയതിനെതിരെ പ്രതിഷേധം

കെ.എസ്.ആർ.ടി.സി ബോണ്ട് സർവീസിലെ (ബസ് ഓൺ ഡിമാൻഡ്) ടിക്ക​റ്റ് നിരക്ക് കുത്തനെ കൂട്ടിയതിനെതിരെ ആറ്റിങ്ങൽ കെ.എസ്.ആർ.ടി.സി ഡിപ്പോയിൽ യാത്രക്കാരുടെ പ്രതിഷേധം. വർക്കല – കല്ലമ്പലം – തിരുവനന്തപുരം റൂട്ടിലെ കെ.എസ്.ആർ.ടി.സി ബോണ്ട് സർവീസിന്റെ ടിക്കറ്റ് നിരക്കാണ് വർധിപ്പിച്ചത്. ടിക്കറ്റ് നിരക്ക് വർദ്ധന സർക്കാർ ജീവനക്കാരായ സ്ഥിരം യാത്രക്കാരെ മുൻകൂട്ടി അറിയിച്ചിരുന്നില്ല. തുടക്കംമുതൽ ഒടുക്കം വരെ 104 രൂപയെന്ന ഒ​റ്റ നിരക്കാണ് വെള്ളിയാഴ്ച മുതൽ യാത്രക്കാരിൽ നിന്ന് കെഎസ്ആർടിസി ഈടാക്കിയത്.

വർക്കലയിൽ നിന്ന് തിരുവനന്തപുരത്തെത്താൻ ബോണ്ട് സർവീസിൽ വ്യാഴാഴ്ച വരെ 85 രൂപയാണ് ഈടാക്കിയിരുന്നത്. കല്ലമ്പലത്ത് നിന്ന് കയറിയാൽ 69 രൂപയും ആ​റ്റിങ്ങലിൽ നിന്ന് 60 രൂപയുമായിരുന്നു നിരക്ക്. കഴിഞ്ഞദിവസം മുതൽ എവിടെ നിന്ന് ബസിൽ കയറിയാലും ഒ​റ്റ നിരക്ക് നൽകണമെന്നാണ് യാത്രക്കാരോട് കണ്ടക്ടർ അറിയിച്ചത്. തുടർന്ന് യാത്രക്കാർ ആറ്റിങ്ങൽ ഡിപ്പോയിലെത്തി പ്രതിഷേധം അറിയിക്കുകയും പലരും ബസ് ബഹിഷ്‌കരിക്കുകയും ചെയ്തു.

Read Also: Loksabha Election 2024 Live Updates | വിധിയെഴുതാൻ കേരളം

ആ​റ്റിങ്ങലിൽ നിന്ന് തിരുവനന്തപുരത്തേയ്ക്ക് പോകാൻ കെ.എസ്.ആർ.ടി.സി ഫാസ്​റ്റ് പാസഞ്ചറിൽ 50 രൂപ മാത്രമാണ് യാത്രാനിരക്ക്. ഇതേ ദൂരം യാത്രചെയ്യാൻ വർക്കലയിൽ നിന്നുള്ള ബോണ്ട് സർവീസിൽ ഈടാക്കുന്നത് 104 രൂപയാണ്. ഇതാണ് പ്രതിഷേധത്തിന്റെ മുഖ്യകാരണം. നിരക്ക് വർദ്ധന മാനേജ്‌മെന്റിന്റെ തീരുമാനപ്രകാരമാണെന്നാണ് ആ​റ്റിങ്ങൽ ഡിപ്പോ അധികൃതരുടെ വാദം. സാധാരണ ബസിലെ യാത്രാനിരക്ക് ഒന്നാം തീയതി മുതൽ വർദ്ധിപ്പിച്ചിരുന്നു. എന്നാൽ ബോണ്ട് സർവീസിലെ നിരക്കിൽ അന്ന് വർദ്ധനവുണ്ടായിരുന്നില്ല.

Story Highlights: KSRTC Bond Service; Protest against increase in ticket prices