മമത ബാനർജിക്കെതിരെ വിവാദ പരാമർശം, യൂട്യൂബർ അറസ്റ്റിൽ

പശ്ചിമ ബംഗാൾ മുഖ്യമന്ത്രി മമതാ ബാനർജിക്കെതിരെ വിവാദ പരാമർശം നടത്തിയ യൂട്യൂബർ അറസ്റ്റിൽ. ഗോവയിൽ നിന്നുമാണ് യൂട്യൂബർ റോഡൂർ റോയിയെ കസ്റ്റഡിയിൽ എടുത്തത്. ഗായകൻ കെകെയുടെ മരണത്തിൽ പശ്ചിമ ബംഗാൾ സർക്കാരിനെ റോഡൂർ റോയി വിമർശിച്ചിരുന്നു.

അഖിലേന്ത്യ തൃണമൂൽ കോൺഗ്രസ് നേതാവ് റിജു ദത്തയുടെ പരാതിയിലാണ് കൊൽക്കത്ത പൊലീസ് നടപടി. പശ്ചിമ ബംഗാളിനും മമത ബാനർജിക്കുമെതിരെ അപകീർത്തികരമായ പരാമർശങ്ങളാണ് യൂട്യൂബർ നടത്തിയതെന്ന് പരാതിയിൽ ആരോപിക്കുന്നു.

മെയ് 31ന്, കൊൽക്കത്തയിൽ നടന്ന പരിപാടിക്കിടെ ഗായകൻ കെകെ മരണപ്പെട്ടതുമായി ബന്ധപ്പെട്ട് റോഡൂർ റോയി സർക്കാരിനെ വിമർശിച്ചിരുന്നു. പരാതി രജിസ്‌റ്റർ ചെയ്‌തതിന് പിന്നാലെ യൂട്യൂബർ തന്നെ അറസ്റ്റ് ചെയ്യാൻ പൊലീസിനെ വെല്ലുവിളിക്കുകയും ചെയ്തു. രബീന്ദ്രനാഥ് ടാഗോറിന്റെ ഗാനങ്ങൾ വളച്ചൊടിച്ചതിനും, ജന വികാരം വ്രണപ്പെടുത്തിയതിനും രണ്ട് വർഷം മുമ്പ് റോയിക്കെതിരെ കേസെടുത്തിരുന്നു.

Story Highlights: controversial remarks against mamata banarjee, youtuber arrested