‘ക്രിസ്റ്റ്യാനോ വില്പനയ്ക്കില്ല, ഈ സീസണു ശേഷവും ക്ലബിൽ തുടരും’; നിലപാട് ആവർത്തിച്ച് എറിക് ടെൻ ഹാഗ്

സൂപ്പർ താരം ക്രിസ്റ്റാനോ റൊണാൾഡോ ക്ലബിൽ തുടരുമെന്നാവർത്തിച്ച് മാഞ്ചസ്റ്റർ യുണൈറ്റഡ് പരിശീലകൻ എറിക് ടെൻ ഹാഗ്. ഈ സീസണു ശേഷവും താരം ക്ലബിൽ തുടരുമെന്ന് അദ്ദേഹം വാർത്താസമ്മേളനത്തിൽ പ്രതികരിച്ചു. യുണൈറ്റഡിലെ കരിയർ മതിയാക്കി ക്രിസ്റ്റ്യാനോ മറ്റ് ക്ലബുകളിലേക്ക് ചേക്കേറാൻ ശ്രമിക്കുന്നു എന്ന റിപ്പോർട്ടുകൾ കഴിഞ്ഞ കുറച്ചുനാളായി വരുന്നുണ്ട്. ക്രിസ്റ്റ്യാനോയ്ക്ക് ഇനി യുണൈറ്റഡിൽ കളിക്കാൻ താത്പര്യമില്ലെന്നും റിപ്പോർട്ടുകളുണ്ട്. ഇതിൻ്റെ അടിസ്ഥാനത്തിനാണ് ടെൻ ഹാഗിൻ്റെ പ്രതികരണം. (erik ten hag cristiano ronaldo)

“ക്രിസ്റ്റ്യാനോ റൊണാൾഡോ വില്പനയ്ക്കില്ല. ഞാൻ അദ്ദേഹത്തിനൊപ്പമാണ് കാര്യങ്ങൾ തീരുമാനിച്ചത്. അദ്ദേഹത്തിനൊപ്പം പ്രവർത്തിക്കാൻ കാത്തിരിക്കുകയാണ്. സാഹചര്യങ്ങൾക്ക് മാറ്റമൊന്നുമില്ല. എനിക്ക് കൃത്യമായ അറിയിപ്പ് കിട്ടിയിട്ടുണ്ട്. ഒരു സീസണിലേക്ക് കൂടി തുടരാനുള്ള സ്വാതന്ത്ര്യം അദ്ദേഹത്തിനുണ്ട്. ഈ സീസണു ശേഷവും അദ്ദേഹം ക്ലബിൽ തുടർന്നേക്കും.”- ടെൻ ഹാഗ് പറഞ്ഞു.

യുണൈറ്റഡ് പ്രീസീസൺ ആരംഭിച്ചെങ്കിലും ഇതുവരെ ക്രിസ്റ്റ്യാനോ ടീമിനൊപ്പം ചേർന്നിട്ടില്ല. കുടുംബപരമായ കാര്യങ്ങളെ തുടർന്നാണ് താരം വിട്ടുനിൽക്കുന്നതെന്ന് യുണൈറ്റഡ് പറയുന്നു. എന്നാൽ, ടീം വിടാൻ ഒരുങ്ങിയിരിക്കുന്നതിനാലാണ് താരം ഇതുവരെ യുണൈറ്റഡിനൊപ്പം ചേരാത്തതെന്ന് റിപ്പോർട്ടുകളുണ്ട്. തനിക്ക് വരുന്ന ഓഫറുകൾ പരിഗണിക്കാൻ ക്രിസ്റ്റ്യാനോ യുണൈറ്റഡിനോട് ആവശ്യപ്പെട്ടു എന്ന് സൂചനയുണ്ട്.

Read Also: ‘ക്രിസ്റ്റ്യാനോയോട് ബഹുമാനം, പക്ഷേ ഞങ്ങൾക്ക് വേണ്ട’; ബയേൺ ഡയറക്ടർ

അതേസമയം, ക്രിസ്റ്റ്യാനോ റൊണാൾഡോയെ സൈൻ ചെയ്യാൻ താത്പര്യമില്ല എന്ന നിലപാട് ജർമൻ ക്ലബ് ബയേൺ മ്യൂണിക്ക് ആവർത്തിച്ചിരുന്നു. ക്രിസ്റ്റ്യാനോയോട് തങ്ങൾക്ക് ബഹുമാനമാണെന്നും താരത്തെ സൈൻ ചെയ്യാൻ താത്പര്യമില്ലെന്നും ബയേൺ സ്പോർടിംഗ് ഡയറക്ടർ ഹാസൻ സാലിഹമിദ്സിക് വ്യക്തമാക്കി.

ക്രിസ്റ്റ്യാനോയുടെ ഏജൻ്റ് ജോർജെ മെൻഡസ് നേരത്തെ തന്നെ ബയേണിനെ സമീപിച്ചിരുന്നു. എന്നാൽ, ബയേണിന് താരത്തിൽ താത്പര്യമില്ലെന്ന് അറിയിച്ചു. ഇതിനു ശേഷം ബയേണിൻ്റെ പോളിഷ് സ്ട്രൈക്കൻ റോബർട്ട് ലെവൻഡോവ്സ്കിയെ ബാഴ്സ ടീമിലെത്തിച്ചു. ഇതിനു പിന്നാലെയാണ് ജോർജ് മെൻഡസ് വീണ്ടും ബയേണിനെ സമീപിച്ചത്.

ബയേണുമായി ചർച്ച നടത്തിയെങ്കിലും സൂപ്പർ താരത്തിൽ ബയേൺ താത്പര്യം പ്രകടിപ്പിച്ചില്ല. ക്രിസ്റ്റ്യാനോയുടെ പ്രായം, ശമ്പളം, കളിശൈലി എന്നിവ പരിഗണിച്ചാണ് ബയേണിൻ്റെ തീരുമാനം.

Story Highlights: erik ten hag about cristiano ronaldo