340 മുറികൾ, 17 വർഷം കൊണ്ട് പണിത് തീർത്ത വസതി; റെയ്സിന ഹിൽസിൽ ദ്രൗപതി മുർമുവിനായി കാത്തിരിക്കുന്നത്…

രാഷ്ട്രപതിയുടെ ഔദ്യോ​ഗിക വസതിയായ രാഷ്ട്രപതി ഭവൻ പുതിയ അധികാരിക്കായി കാത്തിരിക്കുകയാണ്. 64 കാരിയായ ദ്രൗപതി മുർമുവിനെ വരവേൽക്കാനുള്ള ഒരുക്കത്തിലാണ് റെയ്സിന ഹിൽസിലെ 17 വർഷം കൊണ്ട് പണികഴിപ്പിക്കപ്പെട്ട ഈ ബ്രഹ്മാണ്ഡ വീട്. ( rashtrapati bhavan 340 rooms details )

രാഷ്ട്രപതിഭവൻ പണിതതിന് പിന്നിൽ..

സ്വാതന്ത്ര്യം ലഭിക്കുന്നതിന് മുൻപ് ബ്രിട്ടീഷ് ഇന്ത്യയുടെ തലസ്ഥാനം കൊൽക്കത്തയായിരുന്നു. പിന്നീട് 1911 ൽ തലസ്ഥാനം ഡൽഹിയിലേക്ക് മാറ്റി. നൂറ്റാണ്ടുകളോളം നിലനിൽക്കുന്ന, ഓർമിക്കപ്പെടുന്ന ഒരു കെട്ടിടം പണികഴിപ്പിക്കണമെന്ന് ബ്രിട്ടീഷുകാർ ആ​ഗ്രഹിച്ചു. അങ്ങനെ റെയ്സിന ഹിൽസിൽ കെട്ടിടം പണിയാൻ തീരുമാനമായി. അന്നത്തെ പ്രശസ്തനായ ആർക്കിടെക്ട് എഡ്വിൻ ല്യൂട്ടിൻസിന്റെ മേൽനോട്ടത്തിലായിരുന്നു രാഷ്ട്രപതി ഭവന്റെ നിർമാണം.

നാല് വർഷത്തിനുള്ളിൽ പണി തീർക്കാനായിരുന്നു പദ്ധതി. എന്നാൽ 1912 ൽ തുടങ്ങിയ നിർമാണം അവസാനിച്ചത് 1929 ലാണ്.

രാഷ്ട്രപതി ഭവനെന്ന ബ്രഹ്മാണ്ഡ വസതി

സർക്കാർ കണക്കുകൾ പ്രകാരം 700 മില്യൺ ഇഷ്ടികകൾ കൊണ്ടും 3 മില്യൺ കല്ലുകൾ കൊണ്ടുമാണ് രാഷ്ട്രപതി ഭവൻ പണികഴിപ്പിച്ചിരിക്കുന്നത്. 29,000 തൊഴിലാളികളാണ് പണിയെടുത്തത്. 340 മുറികളുള്ള ഈ കെട്ടിടം പരമ്പരാ​ഗത ഇന്ത്യൻ രീതിയും മു​ഗൾ-പാശ്ചാത്യ ശൈലിയും കോർത്തിണക്കിയാണ് രൂപകൽപന ചെയ്തിരിക്കുന്നത്.

രാഷ്ട്രപതി ഭവനിൽ പ്രസിഡന്റിന്റെ താമസ സ്ഥലത്തിന് പുറമെ റിസപ്ഷൻ ഹോൾ, ​അതിഥി മുറികൾ ഓഫിസ്, മു​ഗൾ ​ഗാർഡൻ, അം​ഗരക്ഷരുടെ വീട്, മറ്റ് ഓഫിസുകൾ എന്നിവയുണ്ട്. ബാങ്ക്വറ്റ് ഹോളിൽ ഒരേ സമയം 104 പേരെ ഉൾക്കൊള്ളും. 15 ഏക്കറിലാണ് മു​ഗൾ ​ഗാർഡനുള്ളത്.

Story Highlights: rashtrapati bhavan 340 rooms details