തൊഴിൽ സഭകൾക്ക് ഇന്ന് തുടക്കമാകും; മുഖ്യമന്ത്രി ഉദ്ഘാടനം ചെയ്യും
തദ്ദേശ സ്വയം ഭരണ വകുപ്പിന്റെ നേതൃത്വത്തില് സംഘടിപ്പിക്കുന്ന തൊഴില് സഭകള്ക്ക് ഇന്ന് തുടക്കമാകും. തൊഴില് സഭയുടെ സംസ്ഥാന തല ഉദ്ഘാടനം മുഖ്യമന്ത്രി പിണറായി വിജയന് നിര്വഹിക്കും. തൊഴിലന്വേഷകരെ തിരിച്ചറിഞ്ഞ് അനുയോജ്യമായ തൊഴില് സാധ്യതകള് കണ്ടെത്തുകയും, കേരളത്തിലും രാജ്യത്ത് അകത്തും പുറത്തുമുള്ള തൊഴിലിലേക്ക് നയിക്കുകയുമാണ് സഭകളുടെ ലക്ഷ്യം.
പിണറായി ഗ്രാമപഞ്ചായത്ത് കൺവെൻഷൻ സെന്ററില് രാവിലെ 10 മണിക്കാണ് പരിപാടി. മന്ത്രി എം.ബി രാജേഷ് അധ്യക്ഷത വഹിക്കുന്ന ചടങ്ങിൽ എംപിമാരായ കെ സുധാകരൻ, വി ശിവദാസൻ എന്നിവരും പങ്കെടുക്കും. ആയിരത്തില് അഞ്ചുപേര്ക്ക് തൊഴില് നല്കാനുള്ള പദ്ധതിയും, ഒരു വര്ഷം ഒരു ലക്ഷം സംരംഭങ്ങള് തുടങ്ങാനുള്ള പദ്ധതിയും, കെ ഡിസ്ക് വഴി ഇരുപത് ലക്ഷം പേര്ക്ക് തൊഴില് നല്കുന്ന പദ്ധതിയുമെല്ലാം തൊഴില് സഭകളുടെ സഹകരണത്തോടെയാകും മുന്നോട്ടുപോവുക.
വ്യത്യസ്ത വകുപ്പുകളുടെയും ഏജന്സികളുടെയും പ്രവര്ത്തനങ്ങളെ തദ്ദേശ സ്ഥാപന തലത്തില് ഏകോപിപ്പിച്ചു കൊണ്ട് സര്ക്കാര് സംവിധാനങ്ങളുടെയും സ്വകാര്യ മേഖലകളുടെയും സഹായം തൊഴില് അന്വേഷകരിലേക്ക് നേരിട്ടെത്തിക്കുക എന്നതും തൊഴില് സഭയുടെ പ്രധാന ലക്ഷ്യമാണ്. തൊഴില് മേഖലയിലെ കേരളത്തിന്റെ മഹാമുന്നേറ്റമാകുന്ന തൊഴില് സഭകള് വിജയിപ്പിക്കാന് എല്ലാവരും രംഗത്തിറങ്ങണമെന്ന് തദ്ദേശ സ്വയം ഭരണ എക്സൈസ് വകുപ്പ് മന്ത്രി എം.ബി രാജേഷ് അഭ്യര്ഥിച്ചു.
Story Highlights: Thozhil sabha will begin today; Chief Minister will inaugurate
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here