ഡല്‍ഹിയില്‍ എംഎല്‍എമാരുടെ ശമ്പളം 66 % വര്‍ധിപ്പിച്ചു

ഡൽഹിയിലെ എംഎൽഎമാരുടെ ശമ്പളവും അലവൻസും 66 ശതമാനം വർധിപ്പിക്കാനുള്ള അരവിന്ദ് കെജ്‌രിവാൾ സർക്കാരിന്റെ നിർദേശം രാഷ്ട്രപതി അംഗീകരിച്ചു. വര്‍ധനവ് രാഷ്ട്രപതി ദ്രൗപതി മുര്‍മു ശരിവച്ചതിന് പിന്നാലെ സര്‍ക്കാര്‍ വിജ്ഞാപനം പുറത്തിറക്കി. പ്രതിദിന അലവൻസ് 1000 രൂപയിൽ നിന്ന് 1500 രൂപയാക്കി. ഡൽഹിയിലെ ഭൂരിഭാഗം എംഎൽഎമാരും കെജ്‌രിവാളിന്റെ ആം ആദ്മി പാർട്ടിയിൽ നിന്നുള്ളവരാണ്.

മുഖ്യമന്ത്രി, നിയമസഭാ സ്പീക്കർ, പ്രതിപക്ഷ നേതാവ് എന്നിവർക്ക് ശമ്പളവും അലവൻസും ഉൾപ്പെടെ പ്രതിമാസം 1.70 ലക്ഷം രൂപ ലഭിക്കും. ഇതുവരെ പ്രതിമാസം 72,000 രൂപയായിരുന്നു. ഇത് സംബന്ധിച്ച നിർദ്ദേശം ഡൽഹി നിയമസഭ അംഗീകരിക്കുകയും കേന്ദ്ര ആഭ്യന്തര മന്ത്രാലയത്തിന് (എംഎച്ച്എ) അയയ്ക്കുകയും ചെയ്തിരുന്നു.

“ഏത് സ്ഥാപനത്തിന്റെയും വിജയം പ്രതിഭയെ ആശ്രയിച്ചിരിക്കുന്നു. അവരുടെ ശമ്പളം ഈ കഴിവിന്റെ അവിഭാജ്യ ഘടകമാണ്. നികുതിദായകരിൽ നിന്നാണ് ഞങ്ങൾക്ക് ശമ്പളം ലഭിക്കുന്നത്. അതിനാൽ ശമ്പളം വർധിപ്പിച്ചതിന് പൊതുജനങ്ങളോട് നന്ദി പറയണം” ഉപമുഖ്യമന്ത്രി മനീഷ് സിസോദിയ പറഞ്ഞു.

12 വർഷത്തിന് ശേഷമാണ് ഡൽഹി എംഎൽഎമാരുടെ ശമ്പളം വർധിപ്പിക്കുന്നത്. ഡൽഹിയിലെ എംഎൽഎമാരുടെ ശമ്പളവും അലവൻസും മറ്റ് സംസ്ഥാനങ്ങളുടേതിന് തുല്യമായിരിക്കണമെന്ന് കെജ്‌രിവാൾ സർക്കാർ എംഎച്ച്എയോട് അഭ്യർത്ഥിച്ചിരുന്നു. ബിജെപിയും കോൺഗ്രസും ഭരിക്കുന്ന സംസ്ഥാനങ്ങൾ 1.5 മുതൽ 2 മടങ്ങ് വരെ ഉയർന്ന ശമ്പളവും അലവൻസുകളും നൽകുന്നുണ്ടെന്ന് എഎപി സർക്കാർ പറഞ്ഞിരുന്നു.

Story Highlights :