‘കുടുംബക്കാരെ മുഴുവൻ കൊണ്ടുവന്ന് മത്സരിപ്പിക്കാനാണ് തീരുമാനം; കോൺഗ്രസ് കുടുംബാധിപത്യ പാർട്ടി’; കെ സുരേന്ദ്രൻ

വയനാട് ഉപതെരഞ്ഞെടുപ്പിലെ പ്രിയങ്ക ​ഗാന്ധിയുടെ സ്ഥാനാർ‌ത്ഥിത്വത്തിൽ രൂക്ഷ വിമർശനവുമായി ബിജെപി സംസ്ഥാന അധ്യക്ഷൻ‌ കെ സുരേന്ദ്രൻ. വയനാട് രണ്ടാം വീടാണെന്ന് രാഹുൽ ഗാന്ധി പറഞ്ഞപ്പോൾ ഇത്രയും കരുതിയില്ലെന്നും കുടുംബക്കാരെ മുഴുവൻ കൊണ്ടുവന്ന് മത്സരിപ്പിക്കാനാണ് തീരുമാനമെന്ന് സുരേന്ദ്രൻ ട്വന്റിഫോറിനോട് പ്രതികരിച്ചു. കോൺ​ഗ്രസ് കുടുംബാധിപത്യ പാർട്ടിയാണെന്ന് അദ്ദേഹം വിമർശിച്ചു.

പാലക്കാട് ഉപതെരഞ്ഞെടുപ്പിൽ റോബർട്ട് വദ്രയെക്കൂടി നിർത്തിയാൽ കുടുംബാധിപത്യം സമ്പൂർണമായെന്ന് സുരേന്ദ്രൻ പരിഹസിച്ചു. കേരളത്തിൽ കോൺ​ഗ്രസിന്റെ നേതാക്കൾ ആരും നിന്നാൽ ജയിക്കാത്തത് കൊണ്ടാണോ പ്രിയങ്ക ​ഗാന്ധിയെ മത്സരിപ്പിക്കുന്നതെന്ന് സുരേന്ദ്രൻ ചോദിച്ചു. വയനാട് കുടുംബമാണെന്ന് പറഞ്ഞിട്ട് കുടുംബക്കാരെ കൊണ്ടുവന്ന് മത്സരിപ്പിക്കുന്നതെന്ന് അദ്ദേഹം പരിഹസിച്ചു.

Read Also: ‘തെരഞ്ഞെടുപ്പ് തോൽവിയിൽ അച്ചടക്ക നടപടി സ്വീകരിക്കണം’: ടിഎൻ പ്രതാപനെതിരെ പോസ്റ്റർ

ഉപതെരഞ്ഞെടുപ്പിൽ പച്ചക്കൊടി ഉയർത്തുമോ എന്നാണ് തന്റെ ചോദ്യമെന്ന് സുരേന്ദ്രൻ പറഞ്ഞു. പ്രിയങ്കയെ സ്വീകരിക്കാതെ മുസ്ലിം ലീ​ഗിന് വേറെ വഴിയില്ലെന്ന് അദ്ദേഹം പറഞ്ഞു. വയനാട് ബിജെപി സ്ഥാനാർത്ഥി ആരെന്നത് പാർട്ടിയുടെ കേന്ദ്ര നേതൃത്വം തീരുമാനിക്കുമെന്ന് കെ സുരേന്ദ്രൻ വ്യക്തമാക്കി.

Story Highlights : BJP State president K Surendran against Priyanka Gandhi Wayanad candidateship