സർക്കാരിനെ പ്രതിരോധത്തിലാക്കാൻ രാജ്ഭവന്റെ നീക്കം; ഗവർണറുടെ ഭീഷണിയിൽ വീഴേണ്ടതില്ലെന്ന് CPIM വിലയിരുത്തൽ

സർക്കാർ – ഗവർണർ പോര് തുടരുന്നു. ഉദ്യോഗസ്ഥരെ രാജ് ഭവനിൽ നിന്ന് വിലക്കിയ നടപടി മയപ്പെടുത്തിയെങ്കിലും നിരന്തരം വിശദീകരണം ആവശ്യപ്പെട്ട് കത്തയച്ച് സർക്കാരിനെ പ്രതിരോധത്തിലാക്കാനാണ് രാജ്ഭവന്റെ നീക്കം. മലപ്പുറം പരാമർശത്തിൽ വിശദീകരണം നൽകിയില്ലെങ്കിൽ അത് ഉൾപ്പെടെ ചൂണ്ടിക്കാട്ടി രാഷ്ട്രപതിക്ക് ഗവർണർ കത്ത് നൽകും.

അതേസമയം ഗവർണറുടെ ഭീഷണിയിൽ വീഴേണ്ടതില്ല എന്നാണ് സിപിഐഎമ്മിന്റെ വിലയിരുത്തൽ. ഗവർണർക്കെതിരെ കടുത്ത നിലപാടെടുത്ത് സർക്കാരിന് രാഷ്ട്രീയ പ്രതിരോധം തീർക്കാൻ സിപിഐഎം തീരുമാനിച്ചിട്ടുണ്ട്. സർക്കാർ പ്രതിസന്ധിയിൽ ആകുമ്പോഴുള്ള ഒത്തുകളിയാണ് ഗവർണർ – സർക്കാർ തർക്കം എന്നാണ് പ്രതിപക്ഷത്തിന്റെ നിലപാട്.

Read Also: ഗവർണർക്കെതിരെ പോർമുഖം തുറന്ന് സിപിഐഎം; പരിഹസിച്ച് പ്രതിപക്ഷം

സ്വർണക്കടത്തിലെ ദേശവിരുദ്ധ വിവാദത്തിൽ കൃത്യമായ വിശദീകരണം നൽകണമെന്ന കടുത്ത നിലപാടിലാണ് ഗവർണർ. സർക്കാരിനെ പിരിച്ചുവിടാൻ ഗവർണറെ വെല്ലുവിളിച്ചും സ്റ്റെപ്പിനി ഗവർണർ എന്ന് പരിഹസിച്ചുമാണ് സിപിഐഎം നേതാക്കൾ മുഖ്യമന്ത്രിയ്ക്ക് പിന്തുണയുമായി കളത്തിലിറങ്ങിയത്. സർക്കാരിനെ പിരിച്ചുവിടാൻ സിപിഐഎം കേന്ദ്രകമ്മിറ്റി അംഗം എ കെ ബാലൻ ഗവർണറെ വെല്ലുവിളിച്ചു.

കെയർ ടേക്കർ ഗവർണർ എന്നായിരുന്നു ഇന്നലെ സിപിഐഎം സംസ്ഥാന കമ്മിറ്റി സെക്രട്ടറി എം വി ഗോവിന്ദന്റെ പരിഹാസം. സർക്കാർ പ്രതിസന്ധിയിലാകുന്ന ഘട്ടത്തിൽ പോര് മുറുകുന്നത് പതിവെന്ന് പ്രതിപക്ഷനേതാവ് വി ഡി സതീശൻ പറഞ്ഞു. അതേസമയം ഗവർണർക്ക് പിന്തുണയുമായി ബിജെപി സംസ്ഥാന അധ്യക്ഷൻ കെ സുരേന്ദ്രൻ രംഗത്തെത്തിയിരുന്നു.

Story Highlights : Governor Arif Muhamad Khan vs CPIM