മെക് 7 വിവാദം; ‘പി മോഹനന്റെ പ്രസ്താവന തെറ്റിദ്ധാരണ മൂലം; രഹസ്യ സ്ഥലത്ത് നടത്തുന്ന പരിപാടിയല്ല ഇത്’; അഹമ്മദ് ദേവർകോവിൽ

വ്യായാമ കൂട്ടായ്മ മെക്ക് സെവനെതിരായ വിമർശനത്തിൽ, സിപിഐഎം നിലപാട് തള്ളി മുൻ മന്ത്രിയും ഐഎൻഎൽ സംസ്ഥാന അധ്യക്ഷനുമായ അഹമ്മദ് ദേവർകോവിൽ. തെറ്റിദ്ധാരണയെ തുടർന്നാണ് സിപിഐഎം ജില്ലാ സെക്രട്ടറി പി മോഹനന്റെ പ്രസ്താവനയെന്ന് അഹമ്മദ് ദേവർകോവിൽ പറഞ്ഞു. മെക് സെവനെതിരെ ഇകെ സമസ്ത വിഭാഗം നടത്തിയ പ്രസ്താവന മത കാര്യങ്ങൾ മുൻനിർത്തിയാണെന്ന് അഹമ്മദ് ദേവർകോവിൽ ട്വന്റിഫോറിനോട് പറഞ്ഞു.

ഏതെങ്കിലും കൂട്ടായ്മ വ്യായാമ പരിശീലനം നടത്തുന്നതിനേ എതിർക്കേണ്ടതില്ലെന്ന് അഹമ്മദ് ദേവർകോവിൽ പറഞ്ഞു. ജാതിമത ചിന്തകൾക്കതീതമായാണ് മെക് സെവൻ പ്രവർത്തിക്കുന്നത്. ഒരു തെളിവും ഇല്ലാത്ത സ്ഥിതിക്ക് മെക് സെവന് എതിരെ പറയേണ്ടതില്ല. രഹസ്യ സ്ഥലത്ത് നടത്തുന്ന പരിപാടിയല്ല ഇതെന്ന് അഹമ്മദ് ദേവർകോവിൽ പറഞ്ഞു. താനും ഈ കൂട്ടായ്മയുടെ ഭാഗമായിട്ടുണ്ടെന്ന് അദ്ദേഹം വ്യക്തമാക്കി.

Read Also: മെക് 7 പ്രവർത്തനം സംബന്ധിച്ച സംശയങ്ങൾ; അന്വേഷണം ആരംഭിച്ച് കേന്ദ്ര രഹസ്യാന്വേഷണ വിഭാഗം

മെക് സെവന് പിന്നിൽ മതരാഷ്ട്രവാദികളെന്ന് സിപിഐഎം കോഴിക്കോട് ജില്ലാ സെക്രട്ടറി പി മോഹനനൻ ട്വന്റിഫോറിനോട് പറഞ്ഞു. മെക് 7 തുടങ്ങിയത് സദുദ്ദേശ്യത്തോടെയാണെന്നും പിന്നിൽ തീവ്രവാദസംഘടനകൾ കടന്നുകൂടിയെന്നും അദ്ദേഹം പറഞ്ഞു. സമൂഹത്തിന് ജാഗ്രത വേണമെന്ന് പി മോഹനൻ പറഞ്ഞിരുന്നു.

മെക് സെവനെതിരെ സമസ്ത എ.പി വിഭാഗവും രംഗത്തെത്തിയിരന്നു. മെക് സെവന് പിന്നിൽ ചതിയെന്നും, അതിൽ സുന്നികൾ പെട്ടുപോകരുതെന്നും സമസ്ത എ.പി വിഭാഗം നേതാവ് പേരോട് അബ്ദുറഹ്മാൻ സഖാഫി പറഞ്ഞു.

Story Highlights : Ahamed Devarkovil rejected the CPIM remark against MEC Seven