SKN40: മുഖ്യമന്ത്രി പിണറായി വിജയനുമായി ആര്‍ ശ്രീകണ്ഠന്‍ നായരുടെ പ്രത്യേക അഭിമുഖം; ഇന്ന് വൈകിട്ട് 3.30 മുതല്‍ ട്വന്റിഫോറില്‍ തത്സമയം

മുഖ്യമന്ത്രി പിണറായി വിജയനുമായി ട്വന്റിഫോര്‍ ചീഫ് എഡിറ്റര്‍ ആര്‍ ശ്രീകണ്ഠന്‍ നായരുടെ പ്രത്യേക അഭിമുഖം ഇന്ന് ഉച്ച കഴിഞ്ഞ് 3.30 മുതല്‍ ട്വന്റിഫോറില്‍ തത്സമയം. SKN40 കേരള യാത്രയ്ക്ക് മുന്നോടിയായാണ് പ്രത്യേക അഭിമുഖം.

മാധ്യമരംഗത്ത് ആര്‍ ശ്രീകണ്ഠന്‍ നായര്‍ 40 വര്‍ഷം പിന്നിടുന്ന വേളയിലാണ് ട്വന്റിഫോറും ഫ്‌ലവേഴ്‌സും ചേര്‍ന്ന് SKN 40 കേരള യാത്ര സംഘടിപ്പിക്കുന്നത്. ഇന്ന് വൈകിട്ട് 5 മണിക്ക് തിരുവനന്തപുരം കവടിയാറില്‍ നിന്ന് വമ്പിച്ച റാലിയോടെയാണ് SKN40 കേരള യാത്രയ്ക്ക് തുടക്കം കുറിക്കുക. വൈകിട്ട് ആറ് മണിക്ക് തിരുവനന്തപുരം ടാഗോര്‍ തീയറ്ററില്‍ ആണ് ഉദ്ഘാടനം. അരുത് അക്രമം, ലഹരി എന്ന സന്ദേശമുയര്‍ത്തിയാണ് കേരള യാത്ര സംഘടിപ്പിക്കുന്നത്. രണ്ട് ഘട്ടങ്ങളിലായി 14 ജില്ലകളിലും പര്യടനം നടത്തും.

ഉദ്ഘാടന ചടങ്ങില്‍ മന്ത്രിമാരും സാമൂഹിക, സാംസ്‌കാരിക, രാഷ്ട്രീയ രംഗത്തെ പ്രമുഖരുമടക്കം നിരവധി പേര്‍ പങ്കെടുക്കും. ഗായിക സിത്താര കൃഷ്ണകുമാറിന്റെ ബാന്‍ഡായ പ്രൊജക്ട് മലബാറിക്കസ് ഉദ്ഘാടന രാവിന് മിഴിവേകും.

Read Also: SKN40 കേരള യാത്രക്ക് ഇന്ന് തുടക്കം ; ലഹരിക്കെതിരെ ഒരുമിച്ച് പോരാടാം

ലഹരിവിരുദ്ധ സന്ദേശം സമൂഹത്തിന്റെ എല്ലാ തട്ടുകളിലും എത്തിക്കുക എന്നതാണ് SKN40 കേരള യാത്രയുടെ പ്രധാന ലക്ഷ്യം. കേരളത്തില്‍ സിന്തറ്റിക് ലഹരി പദാര്‍ഥങ്ങള്‍ ഉള്‍പ്പെടെ വ്യാപകമാവുകയും അക്രമങ്ങള്‍ കൂടുകയും ചെയ്യുമ്പോള്‍, പ്രതിരോധം തീര്‍ക്കേണ്ടത് നാം ഓരോരുത്തരുടെയും കടമയാണ്. അതിനുള്ള ജനകീയ സംവാദ വേദി തുറക്കുകയാണ് ട്വന്റിഫോര്‍.

വിവിധ മേഖലകളിലുള്ളവരുമായി നേരിട്ട് സംവദിച്ച് സമൂഹത്തെ ഗ്രസിക്കുന്ന പ്രശ്നങ്ങള്‍ക്ക് എതിരെ ജനകീയ മുന്നേറ്റം സാധ്യമാക്കാനുള്ള ഉദ്യമമാണ് എസ്‌കെഎന്‍40 റോഡ് ഷോ. യുവാക്കളെ കുടുക്കുന്ന അദൃശ്യമായ ലഹരി വലയുടെ കണ്ണികള്‍ കണ്ടെത്താനും നാടിനെ വിറപ്പിക്കുന്ന അക്രമങ്ങള്‍ ഒഴിവാക്കാനുമുള്ള ക്രിയാത്മകമായ ചര്‍ച്ചകള്‍ റോഡ് ഷോയുടെ ഭാഗമായി നടക്കും. ലഹരിയില്‍ നിന്ന് കുട്ടികളെ തിരികെപ്പിടിക്കാന്‍ മാതാപിതാക്കളെ അണിനിരത്തി കര്‍മപരിപാടികള്‍ ആലോചിക്കും. ഈ ഉദ്യമത്തില്‍ നിങ്ങള്‍ക്കും പങ്കുചേരാം. ആര്‍ ശ്രീകണ്ഠന്‍ നായരുമായി ആശയങ്ങള്‍ പങ്കുവെക്കാം.

Story Highlights : SKN @40 : Interview with CM Pinarayi Vijayan