MBA പരീക്ഷയുടെ ഉത്തരക്കടലാസ് കാണാതായ സംഭവം; കൂടുതൽ അന്വേഷണത്തിന് പൊലീസ്

കേരള യൂണിവേഴ്‌സിറ്റി MBA പരീക്ഷയുടെ ഉത്തരക്കടലാസ് കാണാതായതിൽ കൂടുതൽ അന്വേഷണത്തിന് പൊലീസ്. യൂണിവേഴ്സിറ്റി രജിസ്ട്രാർ ഡിജിപിയ്ക്ക് നൽകിയ പരാതിയിൽ പ്രാഥമിക അന്വേഷണം നടത്തും. പരീക്ഷ വീണ്ടും നടത്തുന്നതിൽ മറ്റന്നാൾ ചേരുന്ന പ്രത്യേക യോഗത്തിൽ അന്തിമ തീരുമാനമെടുക്കും.

ഉത്തരക്കടലാസ് നഷ്ടമായതിൽ വൈസ് ചാൻസിലർ വിളിച്ച അടിയന്തര യോഗം ചൊവ്വാഴ്ചയാണ് നടക്കുക. അധ്യാപകനെതിരെ സർവകലാശാല നടപടിയെടുക്കും. അതേസമയം ആലത്തൂർ കഴിഞ്ഞപ്പോഴാണ് ഉത്തരക്കടലാസ് നഷ്ടമായത് അറിഞ്ഞതെന്ന് ഗസ്റ്റ് അധ്യാപകൻ പ്രമോദ് പറയുന്നു. ഹൈവേ ആയതിനാൽ പേപ്പർ പോയത് അറിഞ്ഞില്ല. സഞ്ചരിച്ച വഴികളിലൂടെ ഒന്നിലധികം തവണ തിരച്ചിൽ നടത്തിയെന്നും അധ്യാപകൻ പ്രമോദ് പറയുന്നു.

Read Also: MBA പരീക്ഷയുടെ ഉത്തരക്കടലാസ് നഷ്ടമായ സംഭവം; അധ്യാപകനെതിരെ കർശന നടപടിയുണ്ടാകും, മന്ത്രി ആർ ബിന്ദു

ജനുവരി 13-ാംതീയതി രാത്രി 71 ഉത്തരക്കടലാസുകളുമായി താൻ ബൈക്കിൽ യാത്രചെയ്യുമ്പോഴായിരുന്നു ഉത്തരക്കടലാസുകൾ നഷ്ടമായതെന്ന് അധ്യാപകൻ പറയുന്നു. 2022-24 ബാച്ചിലെ 71 MBA വിദ്യാർത്ഥികളുടെ ഉത്തരക്കടലാസാണ് നഷ്ടമായത്. വീണ്ടും പരീക്ഷ നടത്തുമെന്നാണ് സർവ്വകലാശാലയുടെ വിശദീകരണം. വീണ്ടും പരീക്ഷ നിശ്ചയിച്ചതോടെ വിദേശത്ത് ഉൾപ്പെടെ ജോലിയ്ക്ക് കയറിയ വിദ്യാർത്ഥികൾ പ്രതിസന്ധിയിലായി.

Story Highlights : Police for further investigation in Kerala university MBA exam sheet missing