കെ ഇ ഇസ്മയിലിന്റെ അംഗത്വം പുതുക്കും; CPI എക്സിക്യൂട്ടീവിൽ നിർദേശം

മുതിർന്ന നേതാവ് കെ ഇ ഇസ്മയിലിന്റെ പാർട്ടി അംഗത്വം പുതുക്കാൻ സിപിഐ എക്സിക്യൂട്ടീവ് നിർദേശം. അംഗത്വം പുതുക്കരുതെന്ന പാലക്കാട് ജില്ലാ ഘടകത്തിന്റെ ശിപാർശ തള്ളി.അംഗത്വം പുതുക്കി നൽകാൻ ജില്ലാ ഘടകത്തിന് സംസ്ഥാന എക്സിക്യൂട്ടീവിന്റെ നിർദേശം.

സിപിഐ എറണാകുളം മുൻ ജില്ലാ സെക്രട്ടറി പി രാജുവിന്റെ മരണവുമായി ബന്ധപ്പെട്ട് നടത്തിയ പരസ്യ പ്രതികരണത്തിന്റെ പേരിലാണ് കെ ഇ ഇസ്മയിലിനെ 6 മാസത്തേക്ക് സസ്‌പെൻഡ് ചെയ്തത്. സസ്‌പെൻഷൻ കാലാവധി ആഗസ്റ്റിൽ അവസാനിക്കാനിരിക്കെയാണ് അംഗത്വം പുതുക്കി നൽകുന്ന കാര്യം സംസ്ഥാന എക്സിക്യൂട്ടീവ് പരിഗണിച്ചത്. ഈ നിർദേശം പാലക്കാട് ജില്ലാ കൗൺസിലിലും നൽകും.

പി രാജുവിന് പാർട്ടി നടപടിയിൽ വിഷമമുണ്ടായിരുന്നുവെന്നായിരുന്നു കെ ഇ ഇസ്മായിലിന്റെ പ്രതികരണം. സാമ്പത്തിക തിരിമറി നടത്തി എന്ന ആരോപണത്തിലാണ് പി രാജു സംഘടനാ നടപടിക്ക് വിധേയനായത്. എന്നാൽ അദ്ദേഹം കുറ്റക്കാരനല്ല എന്ന് കണ്ടെത്തിയിട്ടും പാർട്ടി നടപടി പിൻവലിച്ചല്ല. ഇക്കാര്യം പാർട്ടി പരിശോധിക്കുമെന്ന് പ്രതീക്ഷയുണ്ടെന്നും അന്ന് നൽകിയ പ്രതികരണത്തിൽ കെ ഇ ഇസ്മയിൽ പറഞ്ഞിരുന്നു.

പി രാജുവിനെ ചിലർ വേട്ടയാടിയിരുന്നുവെന്നും ഇസ്മയിൽ ആരോപിച്ചിരുന്നു. പി രാജുവിന്റെ സംസ്കാര ചടങ്ങിൽ പോലും ആരും പങ്കെടുത്തില്ലെന്നും അദ്ദേഹം പറഞ്ഞിരുന്നു. ഇസ്മയിലിന്റെ പ്രതികരണത്തിന് പിന്നാലെ പാർട്ടി ഓഫീസിൽ പി രാജുവിന്റെ മൃതദേഹം പൊതുദർശനത്തിനുവെക്കേണ്ടെന്ന് കുടുംബം തീരുമാനിച്ചിരുന്നു.

Story Highlights : CPI executive orders renewal of KE Ismail’s party membership