സർക്കാരിന്റെ ഓണാഘോഷപരിപാടികൾക്ക് ഞായറാഴ്ച തുടക്കം; മുഖ്യാതിഥിയായി മമ്മൂട്ടി

സംസ്ഥാന സർക്കാർ ഒരുക്കുന്ന ഈ വർഷത്തെ ഓണം വാരാഘോഷപരിപാടികൾക്ക് സെപ്തംബർ മൂന്നിന് തിരിശീല ഉയരും. തിരുവനന്തപുരം നിശാഗന്ധി ഓഡിറ്റോറിയത്തിൽ നടക്കുന്ന ആഘോഷപരിപാടികളുടെ ഉദ്ഘാടനം മുഖ്യമന്ത്രി പിണറായി വിജയൻ നിർവ്വഹിക്കും. മെഗാസ്റ്റാർ മമ്മൂട്ടി മുഖ്യഅതിഥിയാകുന്ന ചടങ്ങിൽ നടി മഞ്ജുവാര്യരുടെ നൃത്തവും അരങ്ങേറും.

ഓണാഘോഷത്തിന്റെ വരവ് അറിയിച്ച് സെപ്തംബർ ഒന്നിന് വൈകുന്നേരം ടൂറിസം മന്ത്രി കടകംപള്ളി സുരേന്ദ്രൻ കനകക്കുന്ന് കൊട്ടാരവളപ്പിൽ പതാക ഉയർത്തുന്നതോടെയാണ് ഇത്തവണത്തെ ഓണാഘോഷപരിപാടികൾക്ക് തുടക്കമാവുക. തുടർന്ന് കവടിയാർ മുതൽ മണക്കാട് വരെയുള്ള വൈദ്യുത ദീപാലങ്കാരത്തിന്റെ സ്വിച്ച് ഓൺ, മന്ത്രി എം.എം.മണി നിർവ്വഹിക്കും. ഓണം വാരാഘോഷപരിപാടികളുടെ ഔദ്യോഗിക ഉദ്ഘാടനം നിശാഗന്ധി ഓഡിറ്റോറിയത്തിലാണ് നടക്കുക.

സർക്കാർ ഒരുക്കുന്ന ഓണാഘോഷപരിപാടികൾ ഈ വർഷം നഗരത്തിനകത്തും പുറത്തുമായി മുപ്പത് വേദികളിൽ നടക്കും. 14 ജില്ലകളിലെയും ജില്ലാ ടൂറിസം പ്രോമോഷൻ കൗൺസിലുകളുടെ നേതൃത്വത്തിൽ അതത് ജില്ലകളിലും ആഘോഷപരിപാടികൾ സംഘടിപ്പിക്കുന്നുണ്ട്. സെപ്തംബർ ഒൻപതിന് നടക്കുന്ന വർണ്ണശബളമായ ഘോഷയാത്രയോടെയാണ് ഓണം വാരാഘോഷപരിപാടികൾക്ക് സമാപനമാകും.

state govt onam celebration kick starts on sunday