ജയലളിതയുടെ കോടിക്കണക്കിന് രൂപയുടെ സ്വത്തുക്കൾക്ക് അവകാശമുന്നയിച്ച് ദീപ

അന്തരിച്ച തമിഴ്‌നാട് മുൻ മുഖ്യമന്ത്രി ജയലളിതയുടെ സ്വത്തുക്കൾക്കായി സഹോദര പുത്രി ദീപ ജയകുമാർ ഹൈക്കോടതിയെ സമീപിച്ചു. വേദനിലയം ജയലളിത സ്മാരകമാക്കാനുള്ള സംസ്ഥാന സർക്കാരിന്റെ തീരുമാനം നിയമവിരുദ്ധമാണെന്നും ഹർജിയിൽ ദീപ വ്യക്തമാക്കുന്നു. ഇതോടെ ജയലളിതയുടെ പോയസ് ഗാർഡനിലെ വേദനിലയം ഉൾപ്പെടെയുള്ള കോടിക്കണക്കിന് രൂപയുടെ സ്വത്തുക്കളുടെ അവകാശത്തിന്റെ പേരിൽ നിയമ പോരാട്ടം ഉണ്ടാകുമെന്ന് ഉറപ്പായി.

കഴിഞ്ഞ നിയമസഭാ തെരഞ്ഞെടുപ്പിൽ തെരഞ്ഞെടുപ്പ് കമ്മീഷന് സമർപ്പിച്ച രേഖകൾ പ്രകാരം ജയലളിതയ്ക്ക് 117 കോടി രൂപയുടെ സ്വത്തുക്കളുണ്ട്. ചെന്നെയിലെ വിവിധ സ്ഥലങ്ങളിലെ വീടുകൾ, കൊടനാട് എസ്റ്റേറ്റ്, ഹൈദരാബാദ്, ബംഗളൂരു എന്നിവിടങ്ങളിലെ ഭൂമി, റിസോർട്ടുകൾ, ഫാം ഹൗസുകൾ, മറ്റ് സമ്പാദ്യങ്ങൾ എന്നിവ ഇതിൽ ഉൾപ്പെടും.