ഓടുന്ന കാറിൽ പതിനാറുകാരിയെ കൂട്ടബലാത്സംഗം ചെയ്തു

നോയിഡയിൽ ഓടിക്കൊണ്ടിരുന്ന കാറിൽ പതിനാറുകാരിയെ കൂട്ടബലാത്സംഗം ചെയ്തു. ഗ്രേറ്റർ നോയിഡ സ്വദേശിനിയായ പതിനൊന്നാം ക്ലാസ് വിദ്യാർഥിനിയെയാണ് അകന്ന ബന്ധു ഉൾപ്പെട്ട മൂന്നംഗസംഘം ബലാത്സംഗം ചെയ്തത്.

ഏപ്രിൽ 18ന് ആയിരുന്നു സംഭവം. സ്‌കൂൾ ബസ് പോയതിനെ തുടർന്ന് വീട്ടിലേക്ക് നടന്നു പോവുകയായിരുന്ന പെൺകുട്ടിയെ കാറിലെത്തിയ ബന്ധു അടങ്ങിയ സംഘം വീട്ടിൽ ഇറക്കിവിടാമെന്ന് കുട്ടിയോട് പറയുകയും തുടർന്ന് ഇവർക്കൊപ്പം കാറിൽ കയറിയ പെൺകുട്ടിയെ മൂവരും ചേർന്ന് ബലാത്സംഗം ചെയ്യുകയായിരുന്നുവെന്നും പോലീസ് അധികൃതർ അറിയിച്ചു.

വായിൽ തുണി തിരുകിവച്ചതിനു ശേഷമായിരുന്നു അവർ പെൺകുട്ടിക്ക് നേരെ ലൈംഗികാതിക്രമണം നടത്തിയത്. മാത്രമല്ല ബോധം പോകാനുള്ള മരുന്നു കലർത്തിയ വെള്ളം കുടിപ്പിക്കുകയും ശേഷം വഴിയിൽ ഉപേക്ഷിക്കുകയുമായിരുന്നുവെന്ന് പോലീസ് പറഞ്ഞു.

പെൺകുട്ടി തിരിച്ച് വീട്ടിൽ എത്താത്തതിനെ തുടർന്ന് മാതാപിതാക്കൾ പോലീസിൽ വിവരം അറിയിച്ചു. തുടർന്ന് പോലീസ് നടത്തിയ അന്വേഷണത്തിൽ രാത്രി രണ്ടുമണിയോടെ ഗാൽഗോഷ്യസ് കോളേജ് ഓഫ് എൻജിനീയറിങ് ആൻഡ് ടെക്‌നോളജിക്കു സമീപത്തെ ആളൊഴിഞ്ഞ റോഡിൽനിന്നും പെൺകുട്ടിയെ അബോധാവസ്ഥയിൽ കണ്ടെത്തുകയായിരുന്നു. പ്രതികൾ ഒളിവിലാണെന്നും ഇവർക്കു വേണ്ടിയുള്ള തിരച്ചിൽ പുരോഗമിക്കുന്നതായും പോലീസ് പറഞ്ഞു.