മധ്യപ്രദേശിൽ വാഹനാപകടം; 15 മരണം

മധ്യപ്രദേശിൽ വാഹനാപകടത്തിൽ 15 പേർ മരിച്ചു. ട്രാക്ടർ ട്രോളിയും ജീപ്പും കൂട്ടിയിടിച്ചാണ് അപകടം. ഗ്വാളിയോർ സ്വദേശികളാണ് അപകടത്തിൽപെട്ടത്.

മധ്യപ്രദേശിലെ മൊറേനയിൽ ഇന്ന് പുലർച്ചെ അഞ്ചരയോടെയാണ് അപകടമുണ്ടായത്. ബന്ധുവിൻറെ മരണാന്തര ചടങ്ങിൽ പങ്കെടുക്കാനായി ഗ്വാളിയോറിൽ നിന്ന് മൊറേനിയിലേക്ക് ജീപ്പിൽ പോവുകയായിരുന്നവരാണ് അപകടത്തിൽ പെട്ടത്. മണലുമായി വന്ന ട്രാക്ടർ ട്രോളി ഇവർ സഞ്ചരിച്ച വാഹനവുമായി കൂട്ടിയിടിച്ചായിരുന്നു അപകടം.

അപകടസമയത്ത് ജീപ്പിൽ 20 പേരുണ്ടായിരുന്നു. മരിച്ചവരിൽ 6 പേർ സ്ത്രീകളാണ്. ഗുരുതരമായി പരിക്കേറ്റവരെ മൊറേനയിലെ വിവിധ ആശുപത്രികളിൽ പ്രവേശിപ്പിച്ചു. അപകടശേഷം ട്രാക്ടർ ഡ്രൈവർ ഓടി രക്ഷപ്പെട്ടു.