പ്രളയക്കെടുതിയുടെ മറവില്‍ ഇന്‍ഷുറന്‍സ് തട്ടിപ്പ്; ഏജന്റ് പിടിയില്‍

പ്രളയക്കെടുതിയിൽ അകപ്പെട്ടവരെ സമീപിച്ച് ഇൻഷുറൻസ് തുക വാങ്ങി നൽകാമെന്നും പകരം നിശ്ചിത തുക കമ്മീഷൻ നൽകണമെന്നും ആവശ്യപ്പെട്ട് തട്ടിപ്പ് നടത്താൻ ശ്രമിച്ച ആന്ധ്ര സ്വദേശി പോലീസ് പിടിയിൽ. ഉമ മഹേശ്വര റാവു എന്ന ഇൻഷുറൻസ് ഏജന്റാണ് എറണാകുളം സെൻട്രൽ പോലീസിന്റെ പിടിയിലായത്. ‘ഇൻഷുറൻസ് സർവ്വേയർ ഫോർ യൂണിവേഴ്‌സൽ സാം ബോ’ എന്ന സ്ഥാപനത്തിന്റെ തൊഴിലാളിയാണ് ഇയാൾ. ഇയാളുടെ സ്ഥാപനത്തിലും കൊച്ചിയിലെ വീട്ടിലും പോലീസ് പരിശോധന നടത്തി. നിരവധി രേഖകൾ പിടിച്ചെടുത്തു. ഇതിനോടകം 100 ലധികം പേരെ ഇയ്യാൾ തട്ടിച്ചതായി പോലീസിന് മനസിലാക്കാൻ കഴിഞ്ഞു. എറണാകുളം അസിസ്റ്റൻറ് കമ്മീഷണർ ലാൽജിയാണ് ഇയാളെ പിടികൂടിയത്.