‘എ.എം.എം.എയ്ക്ക് വേണ്ടി വക്കാലത്ത് പറയാന്‍ നിങ്ങള്‍ വരാന്‍ പാടില്ലായിരുന്നു’; കെ.പി.എസി ലളിതയെ വിമര്‍ശിച്ച് ശാരദക്കുട്ടി

താരസംഘടനയായ എ.എം.എം.എയ്ക്ക് വേണ്ടി വക്കാലത്ത് പറയാന്‍ നടി കെ.പി.എസി ലളിത വരാന്‍ പാടില്ലായിരുന്നു എന്ന് എഴുത്തുക്കാരി ശാരദക്കുട്ടി. സംഘടനയില്‍ നിന്ന് രാജിവച്ച നടിമാരോട് മാപ്പ് പറഞ്ഞ് തിരിച്ച് കയറൂ എന്ന് നേരത്തെ വാര്‍ത്താസമ്മേളനത്തില്‍ പറഞ്ഞ കെ.പി.എസി ലളിതയെ രൂക്ഷമായ ഭാഷയില്‍ ശാരദക്കുട്ടി വിമര്‍ശിക്കുകയും ചെയ്തിട്ടുണ്ട്. തന്റെ ഫേസ്ബുക്ക് പോസ്റ്റ് വഴിയാണ് ശാരദക്കുട്ടിയുടെ വിമര്‍ശനം.

പെണ്ണ് ആണിന്റെ കെട്ടുകാഴ്ചയായിരുന്ന കാലം കഴിഞ്ഞു. അവന്റെ കെട്ടകാഴ്ചകള്‍ നിര്‍ഭയമായി പെണ്‍കുട്ടികള്‍ വിളിച്ചു പറയുന്ന ഒരു കാലത്താണ് കെ.പി.എസി ലളിതയടക്കമുള്ളവര്‍ ജീവിക്കുന്നതെന്ന ഓര്‍മ്മപ്പെടുത്തലും ശാരദക്കുട്ടിയുടെ ഫേസ്ബുക്ക് പോസ്റ്റിലുണ്ട്.

ഇന്ന് ഉച്ച കഴിഞ്ഞാണ് താരസംഘടനയെ പിന്തുണച്ചും രാജിവച്ച നടിമാരെ തള്ളിപറഞ്ഞും നടന്‍ സിദ്ദിഖും കെ.പി.എസി ലളിതയും വാര്‍ത്താസമ്മേളനം നടത്തിയത്.

ഫേസ്ബുക്ക് പോസ്റ്റിന്റെ പൂര്‍ണ്ണരൂപം:

പത്തൻപതു വർഷം മുൻപ് അടൂർഭാസി യിൽ നിന്നു നേരിട്ട ദുരനുഭവങ്ങൾ പുറത്തു പറയാൻ അന്ന് കെപിഎസി ലളിതക്കു കഴിയാതിരുന്നത് അന്ന് സമൂഹം ഇത്ര മാത്രം സ്ത്രീപക്ഷത്തുനിന്നു ചിന്തിച്ചു തുടങ്ങുകയോ സാമൂഹിക സാഹചര്യങ്ങൾ സ്ത്രീയുടെ പ്രശ്നങ്ങൾ കേൾക്കാൻ സജ്ജമാകുകയോ ചെയ്യാതിരുന്നതിനാലാണ് എന്നാണ് ഇന്നുച്ച വരെയും ഞാൻ വിശ്വസിക്കാനിഷ്ടപ്പെട്ടത്. ദിലീപിനെ ജയിലിൽ നിങ്ങൾ കാണാൻ പോയപ്പോഴും പൊട്ടിക്കരഞ്ഞപ്പോഴും നിങ്ങളുടെ ചില പ്രത്യേക സാഹചര്യങ്ങൾ ഓർത്ത് ഞാൻ സ്വയം ന്യായീകരിക്കാൻ ശ്രമിച്ചു. പാവത്തിന്റെ നിസ്സഹായത എന്നു കാണാൻ ശ്രമിച്ചു.