മുതലാഖ് ബില്ല് പരാജയപ്പെടുത്താൻ മുസ്ലീം ലീഗ് മുൻകൈ എടുക്കും; കുഞ്ഞാലിക്കുട്ടി

മുതലാഖ് ബില്ല് പരാജയപ്പെടുത്താൻ മുസ്ലീം ലീഗ് മുൻകൈ എടുക്കുമെന്ന് പി.കെ.കുഞ്ഞാലിക്കുട്ടി എംപി. ഇതിനായി യുപിഎയ്ക്ക് പുറത്തുള്ള കക്ഷികളുടെ കൂടി സഹായം തേടുമെന്നും കുഞ്ഞാലിക്കുട്ടി പറഞ്ഞു. ആദ്യ ഘട്ടത്തിൽ കോൺഗ്രസ്‌ ബില്ലിനെ എതിർത്തിരുന്നില്ല. ലീഗിന്‍റെ നിലപാട് കൂടി പരിഗണിച്ചാണ് കോൺഗ്രസ്‌ നിലപാട് മാറ്റിയതെന്നും പി.കെ കുഞ്ഞാലിക്കുട്ടി ഡൽഹിയിൽ വ്യക്തമാക്കി.

മുത്തലാഖ് ബില്‍ സംബന്ധിച്ച് കുഞ്ഞാലിക്കുട്ടി നല്‍കിയ വിശദീകരണം തൃപ്തികരണമാണെന്ന് ഹൈദരലി ഷിഹാബ് തങ്ങള്‍ ഇന്നലെ പറഞ്ഞിരുന്നു. ലോക്സഭാ സമ്മേളന ദിവസം സഭയില്‍ കുഞ്ഞാലിക്കുട്ടി പങ്കെടുക്കാഞ്ഞത് സംബന്ധിച്ചാണ് വിശദീകരണം തേടിയത്. വിശദീകരണ കുറിപ്പ് നല്‍കുകയും ഫോണില്‍ നേരിട്ട് ബന്ധപ്പെടുകയും ചെയ്തുവെന്നാണ് തങ്ങളുടെ പത്രക്കുറിപ്പിലുള്ളത്. വിശദീകരണം തൃപ്തികരമായതിനാല്‍ തുടര്‍ നടപടികള്‍ ഇല്ലെന്നും കുറിപ്പ് വ്യക്തമാക്കുന്നു. ഇതോടെ ഇത് സംബന്ധിച്ച എല്ലാ വിവാദങ്ങളും പാര്‍ട്ടിയുടെ ഉത്തമ താത്പര്യമനുസരിച്ച് അവസാനിപ്പിക്കേണ്ടതാണെന്നും അതേസമയം മേലില്‍ ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ കൂടുതല്‍ ഉത്തരവാദിത്തത്തോടെ പ്രവര്‍ത്തിക്കാന്‍ മുഴുവന്‍ ജനപ്രതിനിധികളും ജാഗ്രതകാണിക്കണം എന്നും പത്രക്കുറിപ്പില്‍ അഭ്യര്‍ത്ഥിക്കുന്നുണ്ട്.