വിശ്വാസി സമൂഹം പാർട്ടിയിൽ നിന്ന് അകന്നത് തോൽവിക്ക് കാരണമായെന്ന് സിപിഐഎം പോളിറ്റ് ബ്യൂറോയിൽ കേരള ഘടകത്തിന്റെ റിപ്പോർട്ട്

വിശ്വാസി സമൂഹവും മത ന്യൂനപക്ഷങ്ങളും പാർട്ടിയിൽ നിന്ന് അകന്നത് കേരളത്തിലെ തെരഞ്ഞെടുപ്പ് തോൽവിക്ക് കാരണമായെന്നുള്ള റിപ്പോർട്ട് സിപിഐഎം കേരള ഘടകം പോളിറ്റ് ബ്യൂറോയിൽ  സമർപ്പിച്ചു. അതേ സമയം ലോക്‌സഭ തെരഞ്ഞെടുപ്പിൽ വോട്ട് ചോർച്ച മുൻ കൂട്ടി കാണുന്നതിൽ കേരള ഘടകം പരാജയപ്പെട്ടെന്ന്  പോളിറ്റ് ബ്യൂറോ യോഗത്തിൽ വിമർശനമുയർന്നു.

വിശ്വാസി സമൂഹവും മത ന്യൂനപക്ഷങ്ങളും പാർട്ടിയുടെ അടിത്തറയിൽ നിന്ന് അകന്നു പോയത് തിരിച്ചടിയായെന്നാണ് പോളിറ്റ് ബ്യൂറോ യോഗത്തിൽ കേരള ഘടകം റിപ്പോർട്ട് സമർപ്പിച്ചത്. എന്നാൽ ഈ പ്രതിഭാസം താൽക്കാലികമാണെന്നും റിപ്പോർട്ടിൽ പറയുന്നു. മുഖ്യമന്ത്രി പിണറായി വിജയൻ പി.ബിയിൽ നിലപാട് വ്യക്തമാക്കിയ ശേഷം കേരളത്തിലേക്ക് മടങ്ങി.

ചർച്ചയിൽ കേരളത്തിലെ തോൽവി മുൻകൂട്ടി കാണാൻ ആകാത്തതിൽ സംസ്ഥാന നേതൃത്വത്തിനെതിരെ രൂക്ഷമായ വിമർശനം ഉയർന്നു . കേരളമുൾപ്പെടെയുള്ള വിവിധ സംസ്ഥാനങ്ങൾ സമർപ്പിച്ച റിപ്പോർട്ടുകൾ പി.ബി നാളെ ചർച്ച ചെയ്യും.