സംസ്ഥാനത്ത് ഇന്ന് കനത്ത മഴയ്ക്ക് സാധ്യത; ഇടുക്കിയിലും വടക്കൻ ജില്ലകളിലും റെഡ് അലേർട്ട്

സംസ്ഥാനത്ത് ഇന്ന് കനത്ത മഴയ്ക്ക് സാധ്യത. ഇന്നും നാളെയും ഇടുക്കിയിലും വടക്കൻ ജില്ലകളിലും റെഡ് അലേർട്ട് പ്രഖ്യാപിച്ചിട്ടുണ്ട്. ശക്തമായ കാറ്റിന് സാധ്യതയുണ്ടെന്നും കാലാവസ്ഥ നിരീക്ഷണ കേന്ദ്രം മുന്നറിയിപ്പ് നൽകുന്നു.

കനത്ത മഴ കണക്കിലെടുത്ത്‌ സംസ്ഥാനത്ത് ഈ മാസം 21വരെയാണ് കാലാവസ്‌ഥാ നിരീക്ഷണ കേന്ദ്രം അതീവ ജാ​ഗ്രത നിർദ്ദേശം പ്രഖ്യാപിച്ചത്. വിവിധ ജില്ലകളില്‍ റെഡ്‌, ഓറഞ്ച്‌ അലേർട്ട് എന്നിവയാണ് പ്രഖ്യാപിച്ചത്. ഇടുക്കിയിലും മലപ്പുറത്തും ഇന്ന് അതി തീവ്ര മഴയ്ക്കു സാധ്യതയുള്ളതിനാൽ റെഡ് അലേർട്ട് പ്രഖ്യാപിച്ചു. ഇന്ന് എറണാകുളം, കോഴിക്കോട്, കണ്ണൂർ ജില്ലകളിൽ അതി ശക്തമായ മഴയുടെ മുന്നറിയിപ്പായ ഓറഞ്ച് അലർട്ടും മറ്റെല്ലാ ജില്ലകളിലും ശക്തമായ മഴയുടെ മുന്നറിയിപ്പായ യെലോ അലർട്ടും പ്രഖ്യാപിച്ചിട്ടുണ്ട്.

നാളെ പത്തനംതിട്ട, ഇടുക്കി കോട്ടയം, ഇടുക്കി, എറണാകുളം ജില്ലകൾ റെഡ് അലേർട്ട് പട്ടികയിലുണ്ട്. എറണാകുളം, മലപ്പുറം, കോഴിക്കോട്‌, വയനാട്‌, കണ്ണൂര്‍ ജില്ലകളില്‍ നാളെയും പത്തനംതിട്ട, കോട്ടയം, തൃശ്ശൂര്‍, മലപ്പുറം പാലക്കാട്‌, വയനാട്‌ ജില്ലകളില്‍ 20നും പത്തനംതിട്ട, കോട്ടയം, എറണാകുളം, ഇടുക്കി ജില്ലകളില്‍ 21നും ഓറഞ്ച്‌ അലേർട്ട് പ്രഖ്യാപിച്ചിട്ടുണ്ട്‌.

Read Also : ഉത്തരേന്ത്യയിലും വടക്ക് കിഴക്കൻ സംസ്ഥാനങ്ങളിലും കനത്ത മഴയും പ്രളയവും; മരണസംഖ്യ 111 കവിഞ്ഞു

മണിക്കൂറിൽ 50 കിലോമീറ്റർ വേഗത്തിൽ കാറ്റടിക്കാൻ സാധ്യതയുള്ളതിനാൽ മത്സ്യത്തൊഴിലാളികൾ കടലിൽ പോകരുതെന്നും മുന്നറിയിപ്പുണ്ട്. ഇന്ന് രാത്രി 11.30 വരെ കേരള തീരത്തു 3.2 മീറ്റർ വരെ ഉയരത്തിലുള്ള തിരമാലകൾക്കും സാധ്യതയുണ്ട്.

താലൂക്ക് തലത്തിൽ കൺട്രോൾ റൂമുകൾ ആരംഭിക്കാൻ സംസ്ഥാന ദുരന്തനിവാരണ അതോറിറ്റി നിർദേശം നൽകി. ഉരുൾപൊട്ടൽ സാധ്യതയുള്ളതിനാൽ രാത്രി മലയോര മേഖലയിൽ യാത്ര ഒഴിവാക്കണമെന്നും ജലാശയങ്ങളിൽ ജലനിരപ്പ് ഉയരാനിടയുള്ളതിനാൽ ജാഗ്രത പാലിക്കണമെന്നും മുന്നറിയിപ്പുണ്ട്.