എറണാകുളം ലാത്തിച്ചാർജ്; മന്ത്രിസഭാ യോഗത്തിൽ സിപിഐഎം, സിപിഐ മന്ത്രിമാർ തമ്മിൽ വാക്‌പോര്

എറണാകുളം ലാത്തിച്ചാർജിനെച്ചൊല്ലി മന്ത്രിസഭാ യോഗത്തിൽ സിപിഐഎം, സിപിഐ മന്ത്രിമാർ തമ്മിൽ വാക്പോര്. എൽദോ എബ്രഹാം എംഎൽഎയെ മർദിച്ച പൊലീസ് നടപടിയിൽ സിപിഐ മന്ത്രിമാർ ശക്തമായി പ്രതിഷേധിച്ചു. സംഭവത്തെ ന്യായീകരിക്കാൻ എ കെ ബാലൻ ശ്രമിച്ചതാണ് വാക്പോരിൽ കലാശിച്ചത്.

എംഎൽഎയെ മർദിച്ചത് ഒരുതരത്തിലും നീതികരിക്കാനാവില്ലെന്ന് മന്ത്രി ഇ ചന്ദ്രശേഖരൻ യോഗത്തിൽ പറഞ്ഞു. തല്ലിയത് സിആർപിഎഫോ സായുധസേനയോ അല്ല. ലോക്കൽ പൊലീസിന് എംഎൽഎയെ കണ്ടാൽ തിരിച്ചറിയില്ലെന്ന് പറയാനാവുമോ എന്നും അദ്ദേഹം ചോദിച്ചു. നിയമവാഴ്ച തകർന്നതിന്റെ ഉദാഹരണമാണിത്. സംഭവത്തിൽ അന്വേഷണം നടത്താനുള്ള തീരുമാനത്തെ സ്വാഗതം ചെയ്യുന്നതായും ചന്ദ്രശേഖരൻ പറഞ്ഞു.

Read also: എസ്.ഐ ആവേശത്തോടെ രണ്ട് കയ്യും ഉപയോഗിച്ച് ലാത്തി കൊണ്ട് തന്റെ പുറത്തടിച്ചു ; പൊലീസിന്റെ പരിക്ക് സംശയകരമെന്നും എൽദോ എബ്രഹാം എംഎൽഎ

ഭരണത്തിലുള്ളവർ സമരത്തിനിറങ്ങിയാൽ ഇങ്ങനെയൊക്കെ വരുമെന്നായിരുന്നു എ കെ ബാലന്റെ പരാമർശം. പിന്നെയും സിപിഐക്കെതിരെ വിമർശനം തുടർന്നപ്പോൾ വി എസ് സുനിൽകുമാറും പി തിലോത്തമനും ബാലനെതിരെ രൂക്ഷപ്രതികരണവുമായി രംഗത്തെത്തി. സമരങ്ങൾ നടത്താൻ ഇനിയും മടിയില്ലെന്നും സമരങ്ങളിലൂടെയാണ് ഇതുവരെ എത്തിയതെന്നും സുനിൽകുമാർ പറഞ്ഞു. ഈ സമയം മുഖ്യമന്ത്രി ഇടപെട്ടാണ് തർക്കം അവസാനിപ്പിച്ചത്. ജില്ലാ കലക്ടറുടെ അന്വേഷണ റിപ്പോർട്ട് വരുന്നമുറയ്ക്ക് ഉചിതമായ നടപടിയുണ്ടാകുമെന്ന് മുഖ്യമന്ത്രി സിപിഐ മന്ത്രിമാർക്ക് ഉറപ്പുനൽകി.