മലങ്കര ഡാമിന്റെ ഷട്ടറുകൾ 10 സെന്റിമീറ്റർ കൂടുതൽ ഉയർത്തി; പീച്ചി ഡാമിന്റെ 2 ഷട്ടറുകൾ നാളെ തുറക്കും

കനത്ത മഴയിൽ ജലനിരപ്പ് ഉയരാൻ സാധ്യതയുള്ളതിനാൽ മലങ്കര ഡാമിന്റെ 6 ഷട്ടറുകളും 20 സെന്റിമീറ്ററിൽ നിന്നും 30 സെന്റിമീറ്ററായി ഉയർത്തി. ഇതേ തുടർന്ന് മൂവാറ്റുപുഴയാറിലെ ജലനിരപ്പ് 30 സെന്റിമീറ്റർ വരെ ഉയരാൻ സാധ്യതയുള്ളതായി അധികൃതർ അറിയിച്ചു.

പീച്ചി ഡാമിന്റെ 2 ഷട്ടറുകൾ നാളെ ഉയർത്തുമെന്ന് തൃശൂർ ജില്ലാ കളക്ടർ അറിയിച്ചു. ഡാമിലേക്കുള്ള നീരൊഴുക്ക് വർധിച്ച സാഹചര്യത്തിൽ മുൻകരുതൽ എന്ന നിലയിൽ മാത്രമാണ് ചെറിയ തോതിൽ അധികജലം പുറത്തേക്ക് വിടുന്നതെന്നും ഒട്ടും ആശങ്ക വേണ്ടെന്നും കളക്ടർ അറിയിച്ചു. മണലിപ്പുഴയുടെയും കരിവന്നൂർ പുഴയുടെയും തീരത്തുള്ളവർ ജാഗ്രത പാലിക്കണമെന്നും മുന്നറിയിപ്പുണ്ട്. 73.45% വെള്ളമാണ് പീച്ചി ഡാമിൽ ഇപ്പോഴുള്ളത് . 77.4 മീറ്ററാണ് ഇപ്പോഴത്തെ ജലനിരപ്പ് .പീച്ചി ഡാമിന്റെ 4 ഷട്ടറുകളിൽ 2 എണ്ണമാണ് നാളെ തുറക്കുക.

പെരിങ്ങൽക്കുത്ത് ഡാമിലെ ജലനിരപ്പ് 419.41 മീറ്ററിൽ നിലനിർത്തി രണ്ടാമത്തെ സ്ലൂയിസ് ഗേറ്റ് കൂടി തുറക്കുമെന്ന് അധികൃതർ അറിയിച്ചിട്ടുണ്ട്. ഇതുകാരണം ചാലക്കുടിപ്പുഴയിൽ ഒഴുക്ക് കൂടുമെന്ന് മുന്നറിയിപ്പ് നൽകിയിട്ടുണ്ട്. പെരിങ്ങൽകുത്ത് ഡാമിന്റെ സ്ലൂയിസ് ഗേറ്റ് തുറക്കുന്ന സാഹചര്യത്തിൽ ചാലക്കുടി ഭാഗങ്ങളിൽ 10 സെന്റിമീറ്റർ വരെ വെള്ളം ഉയരാൻ സാധ്യതയുണ്ടെന്നും ചാലക്കുടി ഭാഗത്തുള്ളവർ ജാഗ്രത പാലിക്കണമെന്നും മുന്നറിയിപ്പുണ്ട്.

കാലാവസ്ഥാ മുന്നറിയിപ്പ് അവഗണിച്ച് കടലിൽ മൽസ്യബന്ധനത്തിനു പോകുന്ന യാനങ്ങളെ തടയുന്നതിന് ഫിഷറീസ് വകുപ്പ് നടപടികൾ ആരംഭിച്ചിട്ടുണ്ട്. പമ്പാനദിയിലും മണിമല, അച്ചൻകോവിൽ ആറുകളിലും ജലനിരപ്പ് ഉയർന്നിട്ടുണ്ട്. കനത്ത മഴയെ തുടർന്ന് മീനച്ചിലാർ കരകവിഞ്ഞൊഴുകുകയാണ്. ജലനിരപ്പ് ഉയരുന്നതിനാൽ ജനങ്ങൾ അതീവ ജാഗ്രത പുലർത്തണമെന്ന് അധികൃതർ അറിയിച്ചിട്ടുണ്ട്. കോട്ടയം ജില്ലയിൽ പല റോഡുകളും കനത്ത മഴയിൽ വെള്ളത്തിൽ മുങ്ങി.

അറുപുഴ-പാറോച്ചാൽ,ഇറഞ്ഞാൽ – തിരുവഞ്ചൂർ, ആയാംകുടി – മാന്നാർ,കടുത്തുരുത്തി – ആപ്പുഴ, ചേർപ്പുങ്കൽ – മരങ്ങാട്ടുപിള്ളി, വടയാർ – എഴുമാം തുരുത്ത് ,കോട്ടയം – പരിപ്പ്, കോട്ടയം-കുമരകം എന്നീ റോഡുകൾ വെള്ളം നിറഞ്ഞു കിടക്കുന്ന സ്ഥിതിയിലാണ്. ഏറ്റുമാനൂർ – പൂഞ്ഞാർ സ്റ്റേറ്റ് ഹൈവേയിൽ മൂന്നാനിയിലും ,വാഴൂർ പുലിയന്നൂർ റോഡിൽ ബ്രില്യന്റ് സ്റ്റഡി സെന്റർ ഭാഗത്തും റോഡിൽ വെള്ളക്കെട്ടാണ്.വള്ളിച്ചിറ- പുലിയന്നൂർ റോഡിലും വെള്ളം കയറി. പാല- കോഴ റോഡിൽ മണലേൽ പാലം വെള്ളത്തിനടിയിലാണ്.

അതിതീവ്ര മഴയ്ക്ക് സാധ്യതയുള്ളതിനാൽ കണ്ണൂർ,മലപ്പുറം,കോഴിക്കോട്, ജില്ലകളിൽ ഇന്ന് റെഡ് അലേർട്ട് പ്രഖ്യാപിച്ചിട്ടുണ്ട്. കനത്ത മഴയ്ക്ക് സാധ്യതയുള്ളതിനാൽ ആലപ്പുഴ, കോട്ടയം, എറണാകുളം, ഇടുക്കി, തൃശൂർ, പാലക്കാട്, വയനാട്, കാസർഗോഡ് ജില്ലകളിൽ ഇന്ന് ഓറഞ്ച് അലേർട്ടുമുണ്ട്. കോഴിക്കോട് ജില്ലയിൽ റെഡ് അലേർട്ട് നിലനിൽക്കുന്ന സാഹചര്യത്തിൽ, ജില്ലയിലെ വിവിധ ഭാഗങ്ങളിൽ ക്യാമ്പുകളിൽ നിന്ന് തിരിച്ചു വീട്ടിലേക്കു പോയവർ പേമാരി മൂലം ബുദ്ധിമുട്ട് നേരിടുന്നുണ്ടെങ്കിൽ തിരിച്ച് ക്യാമ്പുകളിലേക്ക് വരണമെന്ന് ജില്ലാ കളക്ടർ അറിയിച്ചു.