നെടുമ്പാശ്ശേരി വിമാനത്താവളത്തിൽ സ്വർണവേട്ട; പേസ്റ്റ് രൂപത്തിലാക്കിയ ഒരു കിലോ സ്വർണം കസ്റ്റംസ് പിടികൂടി

നെടുമ്പാശ്ശേരി വിമാനത്തവളത്തിൽ പേസ്റ്റ് രൂപത്തിലാക്കിയ ഒരു കിലോ സ്വർണം എയർ കസ്റ്റംസ് ഇന്റലിജൻസ് പിടികൂടി. കണ്ണൂർ പിണറായി സ്വദേശിയായ യാത്രക്കാരനിൽ നിന്നാണ് സ്വർണം പിടികൂടിയത്. ഇയാളെ അറസ്റ്റ് ചെയ്ത് ചോദ്യം ചെയ്തു വരികയാണ്.

കാൽ പാദത്തിൽ കെട്ടിവെച്ചാണ് സ്വർണ്ണം ദുബായിൽ നിന്ന് എത്തിച്ചത്. 27 ലക്ഷം വിലമതിക്കുന്ന സ്വർണമാണ് കണ്ടെടുത്തതെന്ന് എയർ കസ്റ്റംസ് അധികൃതർ അറിയിച്ചു. ഇന്നലെ 71.5 ലക്ഷം രൂപ വിലമതിക്കുന്ന സ്വർണം കടത്താൻ ശ്രമിച്ച രണ്ട് മലയാളികൾ ചെന്നൈ വിമാനത്താവളത്തിൽ പിടിയിലായിരുന്നു.