കൊച്ചുവേളി റെയിൽവേ സ്റ്റേഷനിൽ ജനശതാബ്ദി എക്‌സ്പ്രസ് ഇടിച്ച് ഏഴ് എരുമകൾ ചത്തു

തിരുവനന്തപുരം കൊച്ചുവേളി റെയിൽവേ സ്റ്റേഷനിൽ ജനശതാബ്ദി എക്‌സ്പ്രസ് ഇടിച്ച് ഏഴ് എരുമകൾ ചത്തു. ഇന്ന് വൈകീട്ട് മൂന്ന് മണിയോടെയായിരുന്നു അപകടം. മേയാൻ ഇറങ്ങിയ എരുമകളാണ് ട്രെയിനിടിച്ച് ചത്തത്.

അപകടത്തെ തുടർന്ന് ജനശതാബ്ദി എക്‌സ്പ്രസ് 40 മിനിറ്റ് വേളിയിൽ പിടിച്ചിട്ടു. ശരീര ഭാഗങ്ങൾ ട്രാക്കിൽ കുടുങ്ങിയതോടെ ഏറെ നേരം പരിശ്രമിച്ചിട്ടും ഇവയെ പുറത്ത് എടുക്കാനായില്ല. സംഭവം അറിഞ്ഞ് ആർപിഎഫും പൊലീസും റെയിൽവേ ഉദ്യോഗസ്ഥരും സ്ഥലത്തെത്തി. അപകടത്തെ തുടർന്ന് ഇതുവഴി പോകേണ്ട ചെന്നൈ മെയിൽ ഒരു മണിക്കൂറിൽ അധികം വൈകി. നാട്ടുകാരും പൊലീസും ട്രാക്കിൽ നിന്ന് എരുമകളുടെ മൃതദേഹങ്ങൾ നീക്കിയ ശേഷമാണ് ട്രെയിൻ പുറപ്പെട്ടത്.